Ахсынньы аам-даам тумана, тохсунньу тоһуттар тымныыта, олунньу олуйар олуга, кулун тутар кубулҕаттаах күннэрэ ааһан, Сахабыт сирин салгына барахсан сылыйан, саас кэлэн иһэрэ үчүгэйиин! Киһи-аймах таһырдьа эрэ сылдьыан, үлэлиэн-хамсаныан, оҕо аймах көрүлүү оонньуон баҕарар кэмнэрэ тиийэн кэллэ! Күндээдэ оскуолата Саха өрөспүүбүлүкэтэ төрүттэммитэ 100 сылыгар анаан элбэх үлэни ыытар.
Оскуолабыт оҕолоро хас сыл аайы нэһилиэнньэ кырдьаҕас дьонугар хаар түһэриитигэр, мас хайытыытыгар, хаар таһыытыгар көмө бөҕөнү оҥороллор.
Ол курдук, быйыл Саха АССР төрүттэммитэ 100 сылынан, «Үтүө дьыала» чэрчитинэн, V, VI, IX кылаастар учууталларын Эрик Петрович Никифоров, Татьяна Валерьевна Яковлева, Вера Семеновна Васильева салалталарынан нэһилиэк бэтэрээннэригэр көмөлөстүлэр. 
Оскуолаҕа өр кэмнэргэ завуһунан үлэлээбит бэтэрээн учуутал Нина Николаевна Ксенофонтова, нэһилиэк биир бастыҥ актыыбынай олохтооҕо Мария Кирилловна Нилова: «Оҕолор хаар таһан, соһон үлэ бөҕөнү көрүстүлэр, маладьыастар»,- диэн махтаннылар. Yлэ үөрүү-көтүү, оонньуу-күлүү аргыстаах ааһан, оҕолор бэйэлэрэ астынан тарҕастылар. 
Кылаас салайааччылара оҕолору аһымал санаалаах, кырдьаҕастарга-кыамматтарга болҕомтолоох буола улааталларыгар уһуйаллара олус үчүгэй.
Таисия Иванова.
Күндээдэ, Ньурба.