Тохсунньу 17 күнүгэр Аан дойду үрдүнэн «Оҕо айар – тутар күнэ» диэн биллэриллибит. Бу күҥҥэ анаан биһиги оскуолабытыгар «Фокус күнэ» диэн алын сүһүөх үөрэнээччилэрин икки ардыгар фокус, опыт атастаһыы күрэҕэ тэрилиннэ.

Куонкурус биллэриллээтин кытта оҕолор үөрэ-көтө ким тугу көрдөрүөн сөбүн төрөппүттэрин кытта толкуйдаан барбыттара. Тэрээһин күн, учууталларбыт кылааспытын дьэрэкээн ойуулаах, уоттаах- күөстээх, музыкалаах гына киэргэтии оҥорбуттара көрөргө наһаа үчүгэй этэ. Кыттааччылар бары бэлэмнэнэн кэлбиттэрэ. Көстүүмнээх, элбэх туттар маллаах кэлбиттэриттэн бэлиэтии көрдүм. Фокустары сорохтор биирдиилээн, сорохтор хас да буолан көрдөрөн уопсайа 18 оҕо 14 араас бэрт дьикти, дьэрэкээн, киһи эрэ көрө олоруох фокустарын көрдөрдүлэр. Бу көрбүт фокустарбыттан мин саамай 3 кылаас үөрэнээччитэ Прокопьев Никита хаартынан араас дьикти ньымалары оҥорон көрдөрбүтүн сөбүлээтим. Онтон 3 кылаас үөрэнээччитэ Куприянова Ньургуйаана Куо салгын шаригынан таарыйбакка эрэ харандааһы хамсаппытын бары да сөхтүбүт. Саамай кырачаан кыттааччыларбыт бастакы кылаас үөрэнээччилэрэ Макеева Лаура, Евелева Ева, Колодезникова Николь бэлэмнэнэн кэлбит фокустарын чаҕылхайдык көрдөрөн оҕолору толкуйдаттылар. 2 кылаас үөрэнээччилэрэ бары 100% кыттан түмсүүлээхтэрин, көхтөөхтөрүн көрдөрдулэр. Онтон 4 кылаастан Мессеева Арина, Саввин Саян уонна Тистяхов Айтал кыттан, көрөөччү оҕолору аптаатылар даҕаны, оонньоттулар даҕаны. Куонкурус түмүгүнэн кыайыылаахтар быһаарылыннылар, анал ааттар ананнылар.

Бу маннык тэрээһиннэр элбэхтэ буолаллара буоллар наһаа үчүгэй буолуо этэ. Тоҕо диэтэххэ хас биирдии оҕо аптаах- алыптаах түгэҥҥэ олус итэҕэйэр уонна кыттааччы оҕолор актерскай дьоҕурдарын сайыннарар эбит дии санаатым.

Саргы Игнатьева,
Г.Д.Бястинов-Бэс Дьарааһын
аатынан Чымынаайы
орто оскуолатын 4 кылаас үөрэнээччитэ, Таатта
keskil14