Дьокуускай куорат 2 №-дээх оскуолатыгар муус устар 26 күнүгэр хас да бэлиэ тэрээһин буолан ааста. Олортон биирдэстэрэ дуобат турнира алын сүһүөх кылаастарга бэрт сэргэхтик, тыҥааһыннаахтык ыытылынна. Бу оскуолаҕа СӨ үтүөлээх тренерэ, дуобакка ССРС спордун маастара, СӨ үөрэҕириитин туйгуна, СӨ физическэй култуураҕа тренерэ Василий Иннокентьевич Кононов 1988 сылтан дуобат куруһуогун, сиэксийэтин ситиһиилээхтик үлэлэтэн, оскуола үөрэнээччилэрэ дуобат тумара хонуутугар ситиһиилэрэ үгүөрү. Ол курдук, оскуола кэлэктиибэ уонна үөрэнээччилэрэ норуоттар икки ардыларынааҕы гроссмейстер Николай Гермогеновынан киэн туттуохтарын тутталлар. Кини сахалартан бастакынан 100 харахтаах дуобакка Россия чемпиона буолбута.
Онон алын кылаастарга сыл аайы маннык турнир ыытыллара үтүө үгэс буолбута ыраатта. Күүтүүлээх күрэхтэһиини арыйыы сиэрин-туомун уонна күрэхтэһии хаамыытын биллиилээх спортивнай комментатор, суруналыыс, коллекционер, СӨ култууратын үтүөлээх үлэһитэ, “Кэскил” хаһыакка уһуннук үлэлээбит Александр Васильевич Васильев-Көрдүгэн ыпсарыылаах, ылыннарыылаах тылынан-өһүнэн, остуоруйа курдук уустаан-ураннаан сааһылаан саҥаран ыытта. Саха сиригэр анаммыт значоктарын баай кэлиэксийэтиттэн аҕалан көрдөрдө. Ол курдук, оҕолор Саха сирин авиациятыгар, Саха сирин ытык бэлиэлэригэр, улуустарыгар, куораттарыгар анаммыт значоктары сэргии, тутан-хабан көрдүлэр.
Барыта 20 хамаанда күөн көрүстэ. Хамаанда түөрт киһиттэн турар: ол аата, оҕо, төрөппүт, этэр эбээ, эһээ.
В.М. Владимиров, оскуола дириэктэрэ:
— Сыл аайы Василий Иннокентьевич Кононов көҕүлээһининэн дуобат күрэхтэһиитин ыытан кэллибит. Сүрдээх элбэх оҕо аан дойду таһымыгар күрэхтэһэр. Василий Иннокентьевич дьиҥнээх фанат киһи быһыытынан, маннык үлэни ситминээхтик көҕүлүүр, ыытар.
Н. Н. Гуляев, “Юные якутяне” тирэх киин отделын начаалынньыга 2 №-дээх оскуола иһинэн ыытыллар оҕону өй-санаа өттүнэн иитиигэ, сайыннарыыга төһүү буолар, маныаха Василий Иннокентьевич Кононов 48 сылын үлэлээн кэллэ диэн бэлиэтээн эттэ.
Петр Борисов, “Союз” тутуу хампаанньатын дириэктэрин солбуйааччы:
— Биһиги II кылааска үөрэнэ сырыттахпытына, аан бастаан дуобакка кыттыбыппыт. Онтон ыла араас күрэхтэһиилэргэ кыттан бөҕө. Сорох оҕолор соҕуруу куораттарга, Украинаҕа, Латвияҕа, оннооҕор Америкаҕа тиийбиттэрэ. Биһиги VII кылааска Россияҕа тиийбиппит. Василий Иннокентьевич биһигини элбэххэ үөрэппитэ. Дуобат киһини сайыннарара үгүс.
Павел Попов, “Туймаада-нефть” хампаанньа үпкэ салаатын начаалынньыга:
— Василий Иннокентьевичка улахан махтал. Дуобат толкуйдуурга, анаарарга үөрэтэр. 1988 с. манна куруһуок тэрийбитиҥ — биһиги дьолбут эбит. Эн биһигини булан, дуобакка көҕүлээн, баччааҥҥа диэри доҕордоһобут, “Дуобатчыттар” диэн анал бөлөхтөөхпүт.
Василий Кононов, СӨ үтүөлээх тренерэ, дуобакка ССРС спордун маастара:
— 1988 сылтан ыла ыытыллар турнирбытыттан элбэх оҕо кынаттанан таҕыста, дуобакка утумнаахтык дьарыктанна. Ол дуобаттаабыт оҕолор билигин өрөспүүбүлүкэ араас эйгэтигэр ситиһиилээхтик үлэлииллэр. Ол курдук, аан дойду, Россия биэс төгүллээх чемпиона Николай Стручков, “Саха” НКИХ генеральнай дириэктэрэ Олег Марков, эстрада ырыаһыта, композитор Ульяна Сергучева-Күннэй уо.д.а. дьарыктаммыттара.
«Үс иһигэр киириэхпит диэн эрэллээх этибит»
Хас да чаастаах эрийсиилээх күөн күрэс түмүгүнэн, кимнээх ситиһиигэ тигистилэр?
Ол курдук, II “Г” эрэллээхтик бастаата (кылаас салайааччыта И.В. Алексеева, хамаанда чилиэннэрэ төрөппүт Вилена Кычкина, Кира Устинова, Нарыйаана Птицына, Андрей Харитонов).
Иккис миэстэҕэ II “А” (кылаас салайааччыта В.С. Аргунова, хамаанда чилиэннэрэ Александр, Арылхан Егоровтар, Тимур Лукин, Даяна Прокопьева) таҕыста.
Үһүс миэстэни III “А” кылаас (кылаас салайааччыта Н.С. Петрова, хамаанда чилиэннэрэ Василий, Айдын Бессоновтар, Кирилл Кубаров, Альберт Ильин) ыллылар.
Айдын Бессонов, III “А” кылаас үөрэнээччитэ:
— Мин дуобаты сөбүлээн, Василий Иннокентьевич куруһуогар дьарыктаммытым үһүс сыла. Бэһис туур кэнниттэн сорох хамаандалары кыайдыбыт. Алтыс туурга хас да кыайыыланан, үһүс бочуоттаах миэстэни ыллыбыт.
Кирилл Кубаров, III “А” кылаас үөрэнээччитэ:
— Биэбэйиктэн саҕалаан, дуобат куруһуогар сылдьабын. Онтон оскуолаҕа киирээт, дуобакка уонна саахымакка иккиэннэригэр дьарыктаммытым. I юношескай разрядтаахпын. Дуобат да, саахымат да киһи логикатын сайыннараллар. Биһиги элбэх турнирга кыттабыт. Дьиэбэр аҕабын, эһээлэрбин кытары дуобаттыыбыт, саахыматтыыбыт. Күрэхтэһии иннинэ, үс иһигэр киириэхпит диэн эрэллээх этим.
ххх
Кыайыылаахтар Кубоктарынан, Хайҕал суруктарынан, мэтээллэринэн, бириистэринэн наҕараадаланнылар. Күрэхтэһии эдэр кэскиллээх дуобатчыттар инникитин оскуола чиэһин көмүскүөхтэрэ, дуобат тумара хонуутугар эрэллээхтик, умсугутуулаахтык үктэниэхтэрэ диэн улахан эрэли саҕар.
Жанна Леонтьева.
keskil14.ru