Билигин олох тэтимэ олус түргэн, онон хас биирдии оҕобэйэтин араас хайысхаҕа холонон көрүөхтээх. Сунтаар улууһун Бордоҥ орто оскуолатын 9 кылааһын үөрэнээччитэ Кристина Петрова туризмынан, үҥкүүнэн, фольклорунан, чинчийэр үлэнэн дьарыктанар.
— Оскуолам иһинэн араас хайысхалаах куруһуоктарга дьарыктанабын. Туризм, ВПК «Беркут», «Тэтим» үҥкүү, «Сардаҥа» фольклор ансаамбылларыгар утумнаахтык дьарыктанан үүнэбин, сайдабын.
«Өбүгэ үгэһэ», «Хомус абылаҥа» куруһуоктарга үһүс кылаастан сылдьабын, номнуо 7 сыла буолбут эбит. Өбүгэбит үгэһин, культуратын тарҕатан араас омук сирдэринэн сылдьыбытым. Корея уонна Мексика курдук ыраах сирдэргэ тиийэ норуотум культуратын омук дьонугар билсиһиннэрэрбинэн дьоллоохпун. Москваҕа, Сочига сылдьыбытым. Ол сылдьан, атын норуоттар үгэстэрин, культураларын билэн-көрөн элбэххэ үөрэммитим.
Ону таһынан чинчийэр үлэнэн кыра эрдэхпиттэн дьарыктанабын. Улуус таһымнаах научнай практическай кэмпириэнсийэлэргэ кыттан, кэккэ сэмэй ситиһиилэрдээхпин.
Бу соторутааҕыта буолбут ХИФУ тэрийэн ыыппыт Уһук Илин таһымнаах «Мандар Уус» ааҕыыларыгар «Мандар Уус алгыһынан» диэн үлэбинэн 3 истиэпэннээх диплом ылан үөрүүм муҥура суох. Үгэс быһыытынан, урукку кэмҥэ бэйэҥ тиийэн, дьүүллүүр сүбэ иннигэр көмүскүүр буоллаххына, билиҥҥи олохпут ирдэбилинэн зум платформа нөҥүө НПК ыытыллыбыта. Маннык ыытыллыбыта эмиэ бэйэтэ туспа уратылаах, долгутуулаах эбит.
Уопсайынан билигин олохпут олус балысханнык сайдар, күннээҕинэн уларыйа турар, онно сөп түбэһэн иһиэххэ наадатын өйдөөтүм. Онон билигин оҕо араас хайысхаҕа бэйэтин холонон көрөртөн толлуо суохтаах дии саныыбын. Этэргэ дылы, кыра кыралаан сыалгын ситиһэргэ дьулуһуохтаахпыт, саҥаны, элбэҕи билиэхтээхпит, олоҕу кытта тэҥҥэ хардыылаан иһиэхтээхпит. Оччоҕуна бэйэгэр эрэллээх, күүстээх санаалаах буолаҕын.