Тохсунньу 20 күнүгэр өрөспүүбүлүкэтээҕи анал (коррекционнай) интэринээт оскуолатыгар «Биһиги эйигин кытта» диэн дьиэттэн үөрэнэр доруобуйаларыгар хааччахтаах оҕолорго аналлаах бырайыагы сүрэхтээтилэр.
Бу тэрээһини «Союз женских организаций» чилиэнэ уонна бырайыак салайааччыта Светлана Ефимова иилээн-саҕалаан ыытта. Ыҥырыылаах ыалдьыттарынан Саха Сирин уопсастыбаннай палаататын салайааччыта, «Союз женских организаций» бэрэссэдээтэлэ Анжелика Андреева, оскуола дириэктэрэ Татьяна Мартынова, Арктикатааҕы норуоттар икки ардыларынааҕы оскуола учуутала, айылҕаны харыстааччы Анастасия Дарбасова буоллулар. Ону тэҥэ оскуола үлэһиттэрэ, төрөппүттэр кыттыыны ыллылар.
Светлана Ефимова бырайыак үс түһүмэхтэн турарын уонна үс хайысханан үлэлиирин туһунан сырдатта. Ол курдук, былааннаах бырааһынньыктааҕы тэрээһиннэргэ, психологическэй дьарыктарга (тренинг), киинэни, тыйаатыры көрүү, акцияларга кыттыы көмөлөрүнэн дьиэттэн үөрэнэр доруобуйаларыгар хааччахтаах оҕолор уопсастыбаҕа киириилэрин үлэтэ бырайыак сүрүн сыала буоларын туһунан эттэ.
Анал оскуола үлэһиттэрэ «Биһигини кытта билсиһии” диэн тэттик оонньуулара тэрээһини сонун тыыннаата.
Ыҥырыылаах ыалдьыттар оҕолор төрөппүттэригэр минньигэс бэлэх туттардылар. И.В. Капитонов уонна Н.Н. Баттахов салайааччылаах үөрэнээччилэр бөлөхтөрө тэрээһини музыкальнай нүөмэрдэринэн киэргэттилэр. Түмүккэ сахалыы сиэринэн салама баайаан бырайыагы алҕаатылар.
Амарах сүрэхтээх бырайыак кыттыылаахтарыгар бу үтүө санаалаах уустук үлэлэригэр ситиһиини баҕарыаҕыҥ.
Прокопий Софронеев.