Мин Үөһээ Бүлүү С.Е. Дадаскинов аатынан Кырыкый оскуолатын 6-с кылааһыгар үөрэнэбин. Эрдэ хапсаҕайга сөбүлээн дьарыктанар этим. Тренерим Степанов Степан Павлович эрчийбитэ. Нэһилиэкпит Ыһыаҕар хапсаҕайдаан миэстэлэспиппит.
Быйыл биһиги оскуолабытыгар Константин Егорович Ефимов диэн куораттан саҥа тренер кэлэн үлэлээн эрэр. Кини көҥүл тустуу көрүҥэр дьарыктыыр. Көҥүл тустуу хапсаҕайдааҕар уустук көрүҥ эбит.
Биһиги Алгыс Ильинныын тренербитин, Константин Егоровиһы кытта Дьокуускай куоракка сборданан кэлбиппит. “Триумф” спортивнай комплекска нэдиэлэ устата дьарыктанныбыт. Онтон Таатта улууһун киинигэр Ытык-Күөлгэ саҥа тутуллубут 3 этээстээх лицей интернатыгар сытан эрэ , И.С. Кочкин бирииһигэр оҕолорго ыытыллыбыт “Көҥүл тустууга” өрөспүүбүлүкэтээҕи күрэххэ бастакыбытын күрэхтэстибит. Бу улахан күрэхтэһиигэ өрөспүүбүлүкэ араас муннугуттан олус элбэх оҕо кытта кэлбит.
Тустууга араас албастары тутталларын сэҥээрэ көрдүм. Ордук араастаан эриллэн-мускуллан балаһыанньаттан тахсалларын сөхтүм. Мельница, кочерга, атахха киирии албастарын бэйэм үөрэтэн сатыахпын баҕардым.
Таатта сирин-уотун сөбүлээтим. Биһиги дойдубутуттан олус ыраах турар эбит. Элбэх интэриэһинэй музейдардааҕын сөхтүм. Хас биирдии музей бэйэ-бэйэтиттэн ураты историялаах эбит.
Дьокуускайга баран иһэн Чурапчы интернат оскуолатыгар баар Д.П. Коркин аатынан тустууга аналлаах олус үчүгэй музейы көрдубут. Д.П. Коркин үөрэнээччитэ, Егор Васильевич Пудов тустуу туһунан олус элбэҕи биһиэхэ кэпсээтэ.
Мин сааскы сынньалаҥмын олус туһалаахтык атаардым. Элбэх интэриэһинэй түгэннэри көрдүм. Көҥүл тустуу туһунан элбэҕи биллим.
Ньургун Степанов, С.Е. Дадаскинов аатынан Кырыкый орто оскуолатын 6 кылааһын үөрэнээччитэ. Үөһээ-Бүлүү.
Кэскил14.ру