Тохсунньу 13 күнүгэр, Арассыыйа Бэчээтин күнүгэр, “Кэскил” медиа-оскуола юнкордара Саха Өрөспүүбүлүкэтин Ил Түмэнин бэрэстэбиитэлинэн талыллыбыт Арассыыйа Федерациятын Сенатора, Федерация Сэбиэтин федеративнай тутууга, региональнай политикаҕа, олохтоох салайыныыга уонна Хотугу сир дьыалаларыгар кэмитиэт чилиэнэ Сахамин Миланович Афанасьевы кытта көрүстүбүт.
Сахамин Миланович юнкордары кытта олус истиҥник кэпсэттэ. Мин санаабар, юнкордар уонна РФ Сенатора медиа хайысхаҕа тутуһар принциппыт сөп түбэһэр буолан, уопсай тылы булан, сүрдээх үчүгэйдик кэпсэттибит.
Улахан таһымнаах салайааччы олох ыксаабакка, ханна да тиэтэйбэккэ олорон юнкор оҕолору иһиттэ. Тугунан дьарыктанарбытын, тугу интэриэһиргиирбитин, медиа-оскуолабыт үлэтин туһунан иҥэн-тоҥон ыйыталаста. Кини медиа хайысхаҕа ылсан үлэлэһэ сылдьар юнкордарга общество иннигэр сүгэр эппиэтинэспитин санатта, информацияны дьоҥҥо-сэргэҕэ сөптөөхтүк хайысхалаан, ырытан, анааран тиэрдии билиҥҥи тэтимнээх олоххо хайдах курдук наадалааҕын, суолталааҕын эттэ. Сахамин Миланович информацияны биир күннээх, биир түгэннээх буолбакка, дьону толкуйдатар ис хоһоонноохтук киэҥник көрөн тиэрдэр дьоҕуру, сатабылы бэйэбитигэр сайыннарарбытын истэн үөрдэ.
Сахамин Миланович Афанасьев – норуот талбыт депутата. Ил Түмэн Судаарыстыбаннай Мунньаҕын 70 депутата кинини өрөспүүбүлүкэ интэриэһин көмүскүүр улахан эппиэтинэһи сүктэрэн, Арассыыйа Федерациятын Сэбиэтигэр ыыппыттар. Онон кини Ил Түмэн, Бырабыыталыстыба, биһиги, Саха сирин олохтоохторун интэриэстэрин Арассыыйа таһымыгар көмүскүүр сыаллаах-соруктаах үлэлиир. Улахан эппиэтинэһи сүгэ сылдьар буолан, туруорсар, быһаарсар боппуруостара быыстала суох киирэ турар буоланнар, үлэтэ эмиэ биир оннук быыстала суох барар турар.
– Федерация Сэбиэтэ диэн сокуон үрдүкү уоргана. Арассыыйа сүрүн сокуона – Конституцията – быһаарбытынан, Федерация Сэбиэтин көҥүлэ суох сокуоннар олоххо киирбэттэр, – диэн этэр Сахамин Миланович.
Билигин атын дойдулар биһиги дойдубут утары биллэрэр хааччахтааһыннара Арассыыйа бюджетыгар, үбүгэр-харчытыгар дьайар. Итини барытын сокуон күүһүнэн сөптөөхтүк сааһылаан үлэлээһиҥҥэ, биир бастакынан Арассыыйа дьонун-сэргэтин интэриэһин көмүскээн туран Федерация Сэбиэтэ элбэх үлэни ыытарын биллибит.
– Дойдубут Президенэ Владимир Владимирович Путин государственнай приоритет быһыытынан туруорар сүрүн соруктарыттан биирдэстэрэ – элбэх оҕолоох дьиэ кэргэн ахсаана эбиллиэхтээх. Бу соругу олоххо киллэрэргэ элбэх сокуон оҥоһуллан, ол барыта Федерация Сэбиэтин нөҥүө ааһар. Бары билэргит курдук, дойдубутугар анал байыаннай дьайыылар ыытылла тураллар. Онно кыттыыны ылан, Арассыыйа интэриэһин көмүскүү сылдьар уолаттарбытыгар, кинилэр дьиэ кэргэттэригэр олохторун хааччыйарга Федерация Сэбиэтэ элбэх сокуоннары оҥорор, – диэн кэпсиир Сахамин Миланович.
Федерация Сэбиэтигэр кадровай боппуруостары эмиэ көрөллөр. Холобур, Арассыыйа регионнарыгар прокурордары, силовой блок миниистирдэрин, Конституционнай суут бэрэссэдээтэллэрин, Үрдүкү суут судьуйаларын анааһын – бу барыта Федерация Сэбиэтин нөҥүө ааһар. Сахамин Миланович бу үлэлээбит икки аҥаар сылыгар Конституционнай суут бэрэссэдээтэлин өрөспүүбүлүкэ олохтоохторун аатыттан талааһын түһүмэхтэригэр кыттыбыт. Ону таһынан Үрдүкү суут бэрэссэдээтэлин анааһыҥҥа, Арассыыйа Генеральнай прокурорун таларга, консультация аныырга кыттыыны ылбыт. Маны таһынан Арассыыйа олоҕун-дьаһаҕын хайысхаларынан элбэх сокуоннар бааллар. Федерация Сэбиэтигэр Саха сириттэн Сахамин Милановиһы кытта өрөспүүбүлүкэбит 2010-2014 сс. Президенэ, 2014-2018 сс. Ил Дархана Егор Афанасьевич Борисов эмиэ үлэлиир. Кини аграрнай-ас-үөл политикатыгар уонна айылҕаны туһаныыга кэмитиэт бэрэссэдээтэлин солбуйааччыта.
– Сокуоннарга быыстала суох уларыйыылар киирэ тураллар. Бүгүҥҥү күҥҥэ олох-дьаһах коммунальнай хаһаайыстыбатыгар, тутуу, Арктика, экология сокуоннарыгар уларытыы үлэ бара турар. Сылга иккитэ сааскы уонна кыһыҥҥы сессиялар ыытыллаллар. Арассыыйа сайдыытыгар, дьоно-сэргэтэ сокуон өттүнэн көмүскэлээх буоларыгар туһуламмыт үлэ былааннаахтык ыытыллар, – диэн С.М. Афанасьев бэлиэтээн эттэ.
Вилена СТРУЧКОВА, Х кылаас,
Саха гимназията, Дьокуускай
***
Көрсүһүү туһунан сиһилии https://vk.com/video-199463452_456244365
***
Хаартыскалар https://vk.com/albums-1994