Ахсынньы 17 күнүгэр Чурапчы улууһун Хадаар нэһилиэгэр «Тускул» култуура уонна спорт киинигэр дириҥ суолталаах тэрээһин буолла.
С.Д. Флегонтов аатынан Хадаар орто оскуолатын «Кэскил» медиа-киин юнкордара устубут «Живые голоса ветеранов» киинэлэрин сүрэхтэниитигэр үгүс киһи ыалдьыттаата. Биллэр режиссер, продюсер, сценарист Михаил Лукачевскай ыалдьыттыы кэлбит.
Биһиги Михаил Григорьевичтан киинэ туһунан санаатын туоһулаһан дьоҕус интервью ыллыбыт.
– «Живые голоса ветеранов» киинэ туһунан эйиэхэ туох санаа киирдэ?
– Билиҥҥи эдэр ыччат олус да сайдыылаах, элбэх да кыахтаах эбит диэн сөхтүм. Киһи онтон олус астынар, үөрэр. Инникибит кэскиллээх буолуоҕар итэҕэйэр санааҥ улаатар. Кинилэртэн сырдык санаалаах, саха норуотугар, дойдубутугар үчүгэйи үөскэтэр, үтүөнү үксэтэр дьон үүнэн тахсыахтара диэн эрэнэбин. Киинэ табыллыбыт, киһини долгутар. Онон оҕолорго инникитин ситиһиини, киинэ иккис чааһын усталларыгар баҕарабын.
– Үчүгэй киинэ диэн хайдах буолуохтааҕый?
– Киинэ хайдах буолуохтааҕар халыып, быраабыла диэн суох. Саамай сүрүнэ – киһи оҥорон, үлэлээн иһиэхтээх. Төһөнү оҥорорун тухары саҥаттан саҥаны билэн, сатыыр буолаҕын. Бэйэҥ ураты көрүүлээх, истиилээх буолаҕын. Онон элбэҕи үлэлиэххэ, элбэҕи устуохха наада.
– Саамай бастакы устубут киинэҥ уонна кэнники ханнык киинэлэри устубуккунуй?
– Мин сүрүннээн уус-уран киинэлэри устабын. Бүтэһик улахан үлэлэрим: «Триумф» (Дмитрий Коркин туһунан), «Кыталыктаах кырдалым» (Кыталык Уйбаан кинигэтинэн) устубутум. Бастакы киинэбин 2007 сыллаахха, оскуолаҕа үөрэнэ сылдьан, устубутум. Оччолорго биир кыыһы кытта билсээрибин киинэ устарга туруммутум. Онтон ыла киинэ устуутун айар үлэ оҥостон идэлээх режиссер буолбутум.
– Үлэҥ-хамнаһыҥ айымньылаах буоларын хайдах ситиһэҕиний?
– Киһи хаһан баҕарар этэрдээх буолуохтаах. Бэйэҥ тапталгын, ахтылҕаҥҥын, санааҕын тиэрдэр араас ньымалар бааллар – ырыа, уруһуй, кинигэ, киинэ. Саамай сүрүнэ – киһи толкуйа, өйө-санаата.
София ГОГОЛЕВА, IX кылаас, «Тумус кыһа» медиа-киин,
С.К. Макаров аатынан Чурапчы гимназията
Валерия Степанова хаартыскалара, IX кылаас