«Энергетик» куорат таһынааҕы оҕону чэбдигирдэр лааҕырыгар «Энергетика лета» смена иһинэн төрүччүбүтүн үөрэтэр оҕолорго бүгүн биир умнуллубат күн буолан ааста.
Ол курдук биһиги Саха өрөспүүбүлүкэтин Национальнай бибилэтиэктигэр экскурсияҕа сырыттыбыт. Бу иннинэ биһиэхэ лааҕырга Национальнай бибилэтиэкэ үлэһитэ Виктория Викторовна Ильина ыалдьыттаабыта.
Национальнай бибилэтиэкэ быйыл 100 сылын бэлиэтиир. Биһиги бүгүн өрөспүүбүлүкэбит духуобунай баайын харыстаан илдьэ сылдьар биир улахан тэрилтэбит буоларын туһунан биллибит. Мин бу экскурсияҕа сылдьан элбэҕи өйдөөтүм. Улуустар хаһыаттара барыта манна мунньуллан, түмүллэн сыталлар эбит. Ааҕар саалаҕа киирэн ону хаһан баҕарар көрүөххүн, ааҕыаххын сөп.
Бүгүн биһиэхэ национальнай бибилэтиэкэ new.nlrs.ru саайтыгар киирэн хайдах регистрацияланары кэпсээтилэр. Бэйэҥ туспа личнэй кабинеттанан баран, бэйэҥ төрүччүгүн суруйаргар наадалаах кинигэлэри барытын булуоххун сөп.
Бу күн биһиэхэ «Держись брат!» диэн анал байыаннай дьайыылар медиктэрин туһунан кэпсээтилэр, быыстапка көрдөрдүлэр. Саха сирин төһө билэрбит туһунан викторинаҕа кытынныбыт.
Бүгүҥҥү курдук туһалаах экскурсиялар өссө да буолуохтара диэн эрэнэн туран, бу тэрээһини ыыппыт дьоҥҥо барыларыгар махтанабын.
Ньургун НИКОЛАЕВ, VIII кылаас,
Акана орто оскуолата, Ньурба