Мин Саша Варвариковы кытта ааспыт сылга билсибитим. “Воин” профильнай лааҕыр сменатыгар бииргэ сылдьыбыппыт. Онно атын-атын улуустартан элбэх оҕо кэлбит этэ. Биһиги Сашалыын биир интэриэстээх буолан, олус тапсан доҕордоспуппут. Бастаан волейболга биир хамаандаҕа түбэспиппит. Волейбол хамаанданан оонньуу буолан, киһи бэйэ-бэйэтин кытта үчүгэйдик билсэр. Волейбол кэнниттэн спорт туһунан элбэхтик кэпсэтэр этибит. Ити курдук биһиги доҕордоһуубут спортан саҕаламмыта.
Онтон билигин “Энергетик” куорат таһынааҕы оҕону чэбдигирдэр лааҕырга көрсө түстүбүт. Кини “Воин” профильнай сменатыгар, мин “Энергетика лета” смена иһинэн үлэлиир Төрүччү лааҕырыгар сылдьабыт. Ааспыт кыһынтан бу саҥа көрүстүбүт.
Саша Варвариков Дьокуускай куорат 10 №-дээх оскуолатын Х “Б” кылааһын үөрэнээччитэ. Кини спортсмен. Ол курдук байыаннай-патриотическай кулуупка алта сыл ытыынан, икки сыл чэпчэки атлетиканан, биир сыл ОФП-нан, икки сыл баскетболунан дьарыктаммыт. Кини биир улахан ситиһиитинэн 2024 сыллаахха ыытыллыбыт “Азия оҕолоро” Аан дойдутааҕы спортивнай оонньууларга дойду былааҕын таһаарыыга волонтерунан талыллыбыта буолар.
– Оонньууларга дойду былааҕын таһаарыыга волонтер буолбутум миэхэ улахан ситиһии этэ. Тоҕо диэтэххэ, дойду былааҕын кытта Ийэ дойдуга таптал ыкса сибээстээх, – диэн этэр доҕорум Саша Варвариков.
Доҕорбор ситиһиилэри баҕарабын.
Аристарх ЛУКИН, Х кылаас,
С.Д. Флегонтов аатынан Хадаар орто оскуолата, Чурапчы