Ыам ыйын 31 күнүгэр Дьокуускай куоракка сахалыы тылынан тахсар “Хоппо” сыһыарыыны сүрэхтээтибит. “Кэскил” медиа оскуолаҕа юнкордар сылы эргиччи дьарыктанабыт. Аттыбытыгар туох буола турарын дьоммутугар-сэргэбитигэр тиийэр гына суруйарга, кэпсииргэ үөрэнэбит.
Хайдах олороҕун тыа сирин ыала? Нэһилиэкпит сайдыытын сүрүн тосхоллоро тугуй? Кыстыгы этэҥҥэ туоруурга төһө уматык нааданый? Сылааһы кимнээх хааччыйалларый? Бюджет уонна нолуок мин нэһилиэгим сайдыытын кытта туох ситимнээҕий? Өрөспүүбүлүкэ салалтатыгар олохтоохтор тугу туруорсалларый? Улуус, нэһилиэк баһылыга хайдах туох үлэлии олороруй? Тыа сирин үлэһит дьоно. Кинилэр кимнээҕий? Бу “Кэскил” юнкордара сырдатар үлэлэрин сүрүн тиэмэлэрэ буолаллар.
Кылгас, уһун видеолары оҥорон таһаарыыга бастакы уочарат киһи толкуйдуур, киэҥник көрөр дьоҕура, билиитэ-көрүүтэ улахан оруолу онньуур.
Ону барытын “Кэскил” куратордара, медиа оскуолабыт салайааччылара үөрэтэллэр. Куоракка лааҕырга эмиэ эрчиллэбит.
“Хоппо” сыһыарыы сүрэхтэниитигэр Саха Өрөспүүбүлүкэтин Бырабыыталыстыбатын бэрэссэдээтэлин солбуйааччыта Сергей Васильевич Местников кыттыыны ылла. Кини оҕо төрөөбүт тылын билэ улаатарыгар сүрүн оруолу үөрэх кыһата, төрөппүт ылар диэн бэлиэтээтэ:
– Оҕо төрөөбүт тылынан саҥарар, суруйар, кэпсэтэр буолуутугар хас да хайысха оруолу оонньуур. Бастатан туран, үөрэх кыһата. Оскуолаҕа дириэктэртэн, учууталлартан саҕалаан техническэй үлэһиккэ диэри оҕону кытта хайаан да сахалыы тылынан кэпсэтии ирдэбилэ туруохтаах. Оҕо оскуолаҕа сахалыы тылынан кэпсэтэр эйгэтэ, төрөөбүт тылынан саҥарар усулуобуйата баар буолуохтаах. Төһөнөн элбэх үөрэх кыһатын төрөөбүт тылынан иитэр үлэҕэ хайысхалыыбыт да соччонон оҕолорбут сахалыы саҥаралларын ситиһэбит.
Иккиһинэн, төрөппүттэр. Ол аата ийэ уонна аҕа. Төрөппүт оҕотуттан ирдиир уонна оҕото сахалыы саҥарарын сөбүлүүр буоллаҕына, бу оҕо төрөөбүт тылынан саҥарар, толкуйа, өйө-санаата кытта сахалыы буолар. Уонна улааттаҕына кыбыстыбакка, толлубакка толору сайаҕастык саҥарар буолар. Онтон ийэ, аҕа оҕолорун кытта сахалыы кэпсэппэт буоллахтарына, оҕо төрөөбүт тылыттан тэйэр, кэнники төрөөбүт тылыгар төннөрүгэр уустуктардаах буолар. Ону төрөппүт бэйэтин оҕотун сахалыы саҥарар кэскилин быспат инниттэн оҕотун кытта сахалыы кэпсэтиэхтээх.
***
Сергей Васильевич Местников санаата итинник. Онон оҕолор дьиэ кэргэммитин кытта тэҥҥэ “Хоппо” сыһыарыы нөҥүө сахалыы кэпсэтиэххэйиҥ, сахалыы саҥарыаххайыҥ.
«Хоппо» сыһыарыыны манан киирэн хачайдааҥ:
https://www.rustore.ru/catalog/app/com.smartom.sakhahoppokidstube
Радомир АФАНАСЬЕВ, VIII «А» кылаас,
Л.В. Киренскэй аатынан Амма лиссиэйэ