Н.Е. Иванов аатынан Бөтүҥ орто агрооскуолатыгар айылҕа харыстабылыгар үлэни тэрийии биир сүрүн хайысха буолар.
Бөтүҥҥэ «ЧЭЧИР» оскуола лесничествота 2013 сыллаахтан үлэлиир. Оксана Николаевна Семенова, биология учуутала, Валентина Ивановна Дьячковская, химия учуутала салайаллар. Өрөспүүбүлүкэҕэ биллэр лесник-инспектор Егор Афанасьевич Борисов куратор, наставник быһыытынан үлэлэһэр. Кэккэ сылларга «Кирпииччэ» алааһыттан 50 м. тэйиччи тыаҕа солкону өрөөччү сиэбит тыатын чөлүгэр түһэрии, отун-маһын чинчийии үлэлэрэ уонна аһаҕас халлаан анныгар айылҕа уруоктара ыытылаллар.
Лесничество чэрчитинэн «Хотуйа» экопааркаҕа үгүс үлэ ыытыллыбыта. Оҕолор араас таһымнаах ааҕыыларга ситиһиилээхтик кытталлара. Ону таһынан биир дойдулаахпыт, биология институтун сүрүн научнай үлэһитэ, тыа хаһаайыстыбатын билимин кандидата Иннокентий Апполлонович Федоров салалтатынан 2022 сылтан Хааччах диэн сиргэ лесопитомник тэрийбиттэрэ. Лесопитомник үлэтин туһунан IX кылаас үөрэнээччитэ Егор Онуфриев «Организация питомника древесных растений флоры Якутии в целях последующего использования в лесовосстановлении после масштабных пожаров» диэн үлэтинэн араас таһымнаах ааҕыыларга ситиһиилээхтик көмүскээн турар.
Ахсынньы 18 күнүгэр Н.Е. Иванов аатынан Бөтүҥ орто оскуолатын VIII-IX кылаас үөрэнээччилэрэ холбоһуктаах «ЧЭЧИР» хамаандата өрөспүүбүлүкэ оскуолаларын лесничестволарын III сүлүөтүгэр баран, улахан бөлөххө ситиһиилээхтик кытынныбыт. Салайааччыбыт биология учуутала Ида Иннокентьевна Назарова биһигини АГАТУ-га сырытыннарда. Хамандыырбыт Егор Онуфриев уонна VIII кылаас үөрэнээччилэрэ Настя Назарова, Сайнаара Яковлева, Нарыйа Иванова буолан элбэҕи биллибит, көрдүбүт.
«Тыа таабырына» квест-оонньуу түмүгэр «ЧЭЧИР» хамаанда улахан бөлөххө III миэстэни ылан, 3000 сууммалаах туоһу суругу уонна өйдөбүнньүк бэлэҕи туттубут. Бу сүлүөккэ сылдьан астынныбыт. Олус интэриэһинэй тэрээһиҥҥэ көхтөөхтүк кыттан, бочуоттаах миэстэҕэ тиксэн, үөрэн-көтөн кэллибит.
Инникитин да бу хайысха күүскэ үлэлээн, оҕолор интэриэстэрин тардыа, дойдубут кэрэ айылҕатын харыстыырга иитии-үөрэтии үлэтэ салгыы сайдыа диэн эрэнэбит, итэҕэйэбит.
“Платформа” медиа киин чилиэнэ Нарыйа Иванова,
Бөтүҥ, Амма улууһа.