Бүгүн биһиэхэ сэрии бэтэрээнэ Семенов Степан Трофимович сиэнэ Надежда Семеновна эһэтин уордьанын аҕалан көрдөрдө. Үһүс истиэпэннээх «Слава». Степан Трофимович 1942 сыллаахха сэриигэ ыҥырылларыгар кэргэннээх, уол оҕолоох 43 саастаах «Ворошилов» аатынан колкуос үлэһитэ эбит. Надежда Семеновна: «Улахан хомуурга барбыттары үксүлэрин даҕаны Сталинград уот кутаатыгар киллэрбиттэр. Эһэм сэрии туһунан улаханнык кэпсээбэт этэ. Арай Сталинграды дьүүлэ-дьаабыта биллибэт, үлтү урусхалламмыт, киһи куорат да диир кыаҕа суох дойдута этэ диэн ахтан ааһара. Сталинград кыргыһыытыгар тыыннаах ордон, Курскай диэки сэриилэһэ сылдьан, ыараханнык бааһыран, госпиталга эмтэнэн дойдутугар 1943 сыл күһүнүгэр кэлбитэ.
Албан аат 3 степеннээх орденыгар сэрии кэмигэр түһэриллибитэ 1970 сыллаахха кэлбитэ,»- диэн ахтыытыгар суруйар. Хорсун саллаат сэрииттэн кэлээт айгыраабыт холкуоска күүһэ тиийэринэн үлэлээбитинэн барбыт. Уолуттан элбэх сиэннэнэн үөрэр эбит. Степан Трофимович 1977 сыл күһүнүгэр ыалдьан олохтон туораабыта.
Биһиги нэһилиэктэн үһүс истиэпэннээх «Слава» уордьаннаах өссө Докторов Алексей Афанасьевич, Потапов Семен Владимирович сэрииттэн кэлбиттэр.
Харысхан АНДРЕЕВ, IX кылаас,
Владимир ГЕРАСИМОВ, VIII кылаас.
Тааһаҕар, Бүлүү