Амма улууһун баһылыга Степан Николаевич Кузьмин «Азия оҕолорун» чемпиона буоларын туһунан бастаан соһуйа истибитим. Билигин кини ол туһунан туох дии саныыра буолуой, чемпион буолбута олоҕор хайдах туһалаабыта буолуой диэн наар толкуйдуур этим. Ол иһин Степан Николаевич Кузьмины кытта көрсөн кэпсэтэр түгэн тосхойбутугар мүлчү туппатаҕым.
– Степан Николаевич, «Азия оҕолоругар» мас тардыһыытыгар чемпионнаабытын туһунан, баһаалыста, кэпсээ эрэ. Ити хас сыллаахха этэй?
– 2004 сыллаахха үһүс төгүлүн ыытыллыбыт «Азия оҕолоругар» Саха өрөспүүбүлүкэтин сүүмэрдэммит хамаандата ситиһиилээхтик кыттыбыппыт. Бэйэм ыйааһыммар бастаабытым. Амматтан иккиэ этибит. Марат Иванов бэйэтин ыйааһыныгар иккис миэстэ буолбута. Ити оонньууларга Амма улууһа үс мэтээллээх этибит. Үһүс мэтээли Миша Пахомов аҕалбыта. Билигин кини Михаил Дмитриевич Пахомов. «Триумф» спортивнай комплекс дириэктэрэ.
Ол кэнниттэн 20 сыл ааста. «Азия оҕолоругар» күрэхтэспит, дойдум, Сахам сирин аатын туһугар кыһаллан туран буспут-хаспыт күннэрбин олох умнубаппын. Күн бэҕэһээ курдук өйдүүбүн.
– Степан Николаевич, ити кыайыы эйиэхэ тугу биэрбитэй дии саныыгыный?
– «Азия оҕолоро» бэйэтэ туспа Олимпиада. Ол иһин оҕо сыал-сорук туруоран, күүстээх санаатын түмэн, бэйэтэ баҕаран, хараҕа умайан туран дьарыктанар. Мин санаабар, саамай улахан суолтата, кыайыыта, ситиһиитэ итиннэ сытар.
Биһиги «Азия оҕолоругар» кыттарбыт саҕана Саха өрөспүүбүлүкэтин Президенэ Вячеслав Анатольевич Штыров этэ. Кини оонньууларга кыттыбыт оҕолорго Саха сирин үөрэҕин кыһаларыгар киирэргэ путевкалары биэрбитэ. Онон баҕарар үөрэхпитигэр киирэн, идэ ылан, үлэһит дьон буолан, үлэлии сылдьабыт.
«Азия оҕолоро» баҕа санааны ситиһэргэ угуйар оҕо саас сирдьитэ.
– Степан Николаевич, улахан махтал!
– Кытаат, Эрчим, маладьыас! Интэриэһинэй ыйытыыларын иһин эйиэхэ эмиэ махтал.
Эрчим НИКОЛАЕВ, VIII кылаас,
В.М. Новиков-Күннүк Уурастыырап аатынан Эмис орто оскуолата, Амма