Уһун, тыйыс тымныы кыһыммыт ааһан, сырдык күннээх саас кэлэн, тоҥ буору тобулан тахсар сибэкки – ньургуһун. Биһиги, уолбалар, таптаан мустар, кэпсээн оҥостор сирбитигэр – Кургааммытыгар ньургуһун тыллыбыт!
Киһи барыта таптыы, харыстыы көрөр. Сотору кэминэн Кургааммыт ньургуһун сибэккинэн симэниэ. Быыһыгар, биир эрэ сиргэ, фиолетовай өҥнөөх ньургуһун үүнэр. Киһи барыта ол ураты ньургуһуну көрдүү сылдьар буолааччы.
Биир саас маннык түбэлтэ буолбут. “Кургааҥҥа фиолетовай ньургуһун баар”, – диэн кэпсээн бөҕөтө тарҕаммыт. Хаартыскаҕа түһэрэн статуска таһаарыы буолбут. Арай биир күн ол ньургуһун суох буолан хаалбытыттан үгүс киһи аймаммыт. Көрбөккө хаалбыт дьон хомойбут. Онтон киэһэ оскуола үөрэнээччитэ уол ийэтэ “Оҕом ньургуһун бэлэхтээтэ” диэн оҕотун бэлэҕиттэн үөрбүтүн биллэрэн, хаартыскалаах статус таһаарбыт. Дьон бары сүтүктэрин булан соһуйбуттар. Уол ийэтигэр истиҥ сыһыаныттан ис сүрэхтэриттэн үөрбүттэр.
Итинник фиолетовай ньургуһун сылын аайы Уолба дьонун үөрдэр. Онтон эһиэхэ хайдах өҥнөөх ньургуһун үүнэрий?
Ньургуһун туһунан маннык чахчылары буллум.
Саамай элбэх ньургуһун көрүҥэ Кавказ сиригэр үүнэр эбит. Сыалай 16 көрүҥү көрбүттэр. Россия Кыһыл кинигэтигэр ньургуһун алта көрүҥэ киирэр.
Алёна ТАППЫРОВА, VI кылаас,
В.И. Ленин аатынан Уолба орто оскуолата, Таатта