Дьокуускай куоракка мөлтөхтүк истэр оҕолорго остуол тенниһигэр өрөспүүбүлүкэтээҕи чемпионат буолан ааста.Биһиги оскуолабытыттан 10 кылаас үөрэнээччитэ Виктория Лебедкина ситиһиилээхтик кыттан кэллэ. Ол курдук, Виктория доруобуйаларынан хааччаахтаах оҕолорго өрөспүүбүлүкэтээҕи теннис күрэҕэр I миэстэ, улахан дьоҥҥо II миэстэ буолан нэһилиэкпитигэр, улууспутугар үгүс үөрүүнү аҕалла!
Виктория тренерэ Семен Семенович Лебедкинтэн Виктория дьарыгын уонна бу күрэхтэһии туһунан кэпсэттибит.
— Оҕобут кыра эрдэҕиттэн мөлтөхтүк истэр. Сөбүлүүр эбии дьарыктаах буоллун диэн спорка сыһыарарга санаммыппыт. Спорт көрүҥнэрин сыымайдаан көрбүппүт. Эчэйиитэ суох көрүҥү тала сатаабыппыт. Онон толкуйдууругар, эт-хаан өттүнэн сайдарыгар сөптөөх буоллун диэн тенниһи талбыппыт. Бастаан билсиһиннэрэ диэн теннис лааҕырыгар ыытарга санаммытым. Бу кэмҥэ куйаар ситимигэр тахсыбыт Василий Яковлев 15 күннээх сайыҥҥы лааҕыр үлэлэтэрин туһунан биллэриини булан, кыыспытын онно ыыппыппыт.Виктория лааҕырга дьарыктаммытын олус сөбүлээн кэлбитэ. Салгыы үөрэх дьыла саҕаламмытыгар ДЮСШ- ҕа Александр Андреевич Иванов секциятыгар биэрбитим. Дүллүкүттэн күн аайы суол хаалыар диэри таспытым. Ол саас бастакы күрэхтэһиитигэр кыттыбыта. Доруобуйаларынан хааччахтаах оҕолорго баран өрөспүүбүлүкэҕэ 2-с миэстэ буолбута.Эһиилгититтэн кыралаан күрэхтэһэн, ситиһиилэр кэлэн барбыттара.Бу баран кэлбит күрэхпитигэр 18-гар диэри саастаах оҕолорго кытынна. Чемпионат «Дохсун» спортивнай комплекска ыытылынна.Виктория оҕолорго 1- кы миэстэни ылла. Онтон улахан дьоҥҥо киирэн кытынна. Бэрэбиэркэлэнэн көрдүн диэн, кылаабынай судьуйа Макар Николаевич көҥүллээн киллэрэн, 2-с миэстэни ылла. Манна 16 киһи кытынна.Бу биһиги оҕолорго 3-с күрэхтэһиибит буолар, онтон улахан дьоҥҥо холонон көрүү. Оҕобут сөптөөх дьарыгын булан, ситиһиилэммититтэн төрөппүттэр олус үөрэбит.
Онтон биһиги Викториялыын кэпсэттибит.
-Остуол тенниһинэн хаһааҥҥыттан дьарыктанаҕын, кимиэхэ?
-Мин 7-с кылаастан дьарыктанан саҕалаабытым. Тренерим — аҕам Семен Семенович.
-Ханнык таһымнаах күрэхтэһиилэргэ кытта сылдьыбыккыный?
-Мин улууска уонна өрөспүүбүлүкэтээҕи күрэхтэргэ барыта 14-тэ кыттыбытым.
— Бу дьарыккын сөбүлүүгүн дуо? Ханна эрчиллэҕиний?
— Олус сөбүлүүбүн. Кыһын манна спорт саалаҕа дьарыктанабын. Күрэхтэһиигэ кыттарбар Үөһээ Бүлүүгэ киирэн эбии эрчиллэбин.
— Дьиэҕэр теннис остуоллааххын дуо?
-Дьиэбэр теннистиир остуолум суох, онон сайыҥҥы өттүгэр эрчиллибэппин.
-Өссө эбии ханнык атын спордунан дьарыктаныаҥ этэй?
-Мин сүүрүүгэ сылдьыахпын баҕарабын.
— Инники ханнык күрэхтэһиилэр күүтэллэр?
— Бэс ыйыгар Дьокуускайга барыахтаахпын. Үөһээ Бүлүү хамаандатыгар баарбын. Доруобуйаларынан хааччахтаах дьоҥҥо «Дьулуур» диэн спартакиада буолар. Онно бэлэмнэнэбит.
— Виктория, кэпсэппиккэр махтал! Сайыҥҥы күрэхтэһиигэр ситиһиини баҕарабыт!
Бииргэ үөрэнэр оҕобут спорка ситиһиититтэн үөрэбит, кини тулуурдаахтык бэлэмнэнэн, аныгыскы күрэхтэһиилэргэ эмиэ ситиһиилээхтик кыттыа диэн эрэнэбит.
Айыына Петрова, 9 кылаас, Сааскыйа Васильева, 10 кылаас, «Эрчим» медиакиин