Томтор оскуолатыгар «Тиһэх чуораан» күнэ үрдүк таһымнаахтык ааста. 11-с кылааһы бүтэрбит 9 үөрэнээччи оҕо сааһы кытта бырастыылаһан, улахан олоххо үктэннилэр.
Үөрүүлээх чааһын оскуола салайааччыта Ярослав Карлович Винокуров арыйда. Кини 2026 сыллааҕы 9-с уонна 11-с кылаастар выпускниктарын судаарыстыбаннай итоговай аттестацияҕа киллэрэр туһунан бирикээһи ааҕан иһитиннэрдэ. Дьоһуннаах, долгутуулаах экзаменнар саҕаланыылара хас биирдии үөрэнээччи олоҕор саҥа кэрдииһи арыйда.
Букэ мустата выпускниктарга эрэллээх наставнигынан, кылаас салайааччытынан – Любовь Павловна Берёзкина буолар. Кини эдэр дьону түмэн, кинилэргэ саамай сүрүн хаачыстыбаны – олоххо көхтөөх дьулуһууну иҥэрбитэ.
Выпускниктар, Өймөкөөн улууһун киэн туттуулара, кинилэр ортолоругар икки медалист баар: Неустроев Никита уонна Спиридонова Нарыйа. Кондаков Андрей – хотугу многоборьеҕа успуорт маастара. Неустроева Кристина Малая академия наук чилиэн-кэриспэндиэнэ. Кылаас бары «hэйм» үҥкүү бөлөҕүн үҥкүүһүттэрэ. Кинилэр «Бастакылар хамсааһыннарын» көхтөөх кыттыылаахтара, волонтердар уонна «Спортивные якутяне» спартакиадаҕа, араас олимпиадаларга элбэхтик кыттан хас да төгүллээх кыайыылаахтара.
Наҕараадалааһын үөрүүлээх чааһа олус киэҥ хабааннаахтык ааста. Иитиллээччилэрин эҕэрдэлии Томтор нэһилиэгин баһылыга Алексей Николаевич Винокуров уонна выпускниктар оскуола таһынааҕы олохторун кытта сибээстээх бары тэрилтэлэр бэрэстэбиитэллэрэ: Оҕо ускуустубатын оскуолата, Оҕо-ыччат успуорт оскуолата уо.д.а. кэлбиттэрэ. Оскуоланы бүтэриигэ бастакы кылаастар алгыстара уонна «Үтүө санаа көтөр аала» акцияҕа кыттыылара долгутуулаах буолла.
Выпускниктар учууталларыгар уонна төрөппүттэригэр кэнсиэр көрдөрдүлэр. Төрөппүттэр оҕолоругар – Санкт-Петербургка «Алые паруса» ыҥырыы билиэти бэлэх ууннулар. Ити курдук бу күн оскуоланы быйыл бүтэрэн улахан олоххо үктэнэр оҕолорго элбэх үтүө өйдөбүллэри бэлэхтээтэ.
Эксээмэннэрин ситиһиилээхтик туттаран, баҕалаах үөрэхтэригэр киирэллэригэр, барыта этэҥҥэ буоларыгар баҕарабыт.
Зияева Малика, 10 кылаас
Н.М. Заболоцкай аатынан Томтор орто оскуолата
юнкорпост «Чуурукта», Өймөкөөн