Дьокуускай куоракка «Развитие моей малой Родины» (РММР) стратегическай дьылабыай оонньууга кыттыыны ыла сылдьаммын «Алмазэргиэнбаан» биирдиилээн бизнес управлениетын начальнигын Валентина Рубеновна Михайлованы көрсөн кэпсэппитим.
Валентина Рубеновна: «Оҕолор төрөөбүт улуустарын, нэһилиэктэрин сайыннарыыга, нэһилиэк сайдар өрүттэрин көрөн онно бизнес арыйан, үлэни тэрийэр туһунан толкуйдууллара олус үчүгэй», – диэн бэлиэтээтэ.
Кини «Развитие моей малой Родины» (РММР) оонньууну тэрийээччи Дмитрий Кириллович Титов ыҥырыытын ылынан, оҕолор бырайыактарын көрүүгэ, сыаналааһыҥҥа эксперт быһыытынан үлэлээтэ. Валентина Рубеновна бэйэтэ баан үлэһитэ, биирдиилээн бизнеһи сайыннарыыга үлэлэһэ сылдьар киһи буолан, оҕолор үлэлэрин бары өттүттэн көрөн сыаналаабыт.
– Араас бырайыактар бааллар. Кыратан саҕаалан улахаҥҥа тиийэ. Барыларын биир кэрдиискэ туруоран көрөр уустук эрээри төһө кыалларынан киэҥник, дириҥник көрөн сыаналаатым. Бастатан туран, оҕолор бэйэлэрин тылларынан тиэмэлэрин арыйан кэпсиир сатабылларыгар болҕомтобун уурдум. Саҥаны саҕалыыр киһи мин санаабар, бастаан идеятын уратытык, итэҕэтиилээхтик, баар чахчыларга олоҕуран, дириҥник арыйан көрдөрүөхтээх, – диэн санаатын үллэһиннэ.
Валентина Рубеновна оҕолор үлэлэрин сыаналааһыҥҥа тутуһар сүрүн санаатынан Нам улууһун хамаандаларын бырайыактарын сэргээбит.
– Оҕолор тутталлара-хапталлара, бэйэлэрин тылларынан кэпсииллэрэ бэйэлэр оҥорбут бырайыактарыгар интэриэстээхтэрэ көстөр. Аны туран атын нэһилиэктэри кытта холбоһон бары биир хамаанда буолан кэлбиттэр. Алдан оройуонун оҕолоро эмиэ үчүгэй баҕайы бырайыактаахтар. Сосновай шишкаттан бэйэтиттэн үүннэрэн таһааран, айылҕа тугу сүтэрбитин ситэрэн биэрэбит диэн билиһиннэрбиттэрин наһаа сэргээтим. Чахчы бу олоххо киирэр ураты бырайыак диэн сыаналаатым, – диэн эттэ.
Ити курдук «Развитие моей малой Родины» (РММР) стратегическай оонньууга кыттан, эксперты кытта кэпсэтэн, бырайыак көмүскээһиҥҥэ үөрэнним, элбэҕи иҥэринним, саҥаны арыйдым. Толкуйум кэҥээтэ.
Сайаана ФЕДОРОВА, VI кылаас,
С.Д. Флегонтов аатынан Хадаар орто оскуолата, Чурапчы