Хаар уонна муус – хоту сир туллар тутааҕа, уратыта. Биһиги, тымныы дойдуга олорор дьон, төһө баҕарар муус, хаар оҥоһуктары дьэндэтэр, тулабытын биллэ сэргэхситэр кыахтаахпыт. Хаартан, муустан эриэккэс көстүүнү айан таһаарар уус илиилээхтэр истэригэр оҕолор эмиэ бааллар.
Худуоһунньук, туойдьут, педагог, Россия худуоһунньуктарын Сойууһун чилиэнэ Мария Николаевна Гуляева-Туойа былырыын саас үөрэнээччилэрин мууһунан үлэлииргэ көҕүлээн, кини салалтатынан кыргыттар билигин араас композицияны чочуйан таһаараллар.
Ол курдук, былырыын саас Дьокуускай куорат дьаһалтата тэрийбит күрэҕэр Л.А. Ким аатынан ойуулуур-дьүһүннүүр искусство оскуолатын иитиллээччилэрэ Сайаана Гурьева, Алина Георгиева “Оҕо куйуурдуу турара” композицияларынан I миэстэ буолбуттара.
Бастакы күрэхтэһииттэн кынаттанан, кыайыы үөрүүтүн билэн, кыргыттар тымныыны, тыалы, силлиэни тулуйан, илиилэрин араарбакка дьулуһан үлэлииллэр. Быйыл “Ледовые фантазии” диэн паарка көҕүлүүр күрэхтэһиитигэр тиийэн, “Сыл бэлиэтин” оҥорон, сертификат туппуттара. Ахсынньыга “Магаданский хрусталь” диэн муус оҥоһуктар норуоттар икки ардыларынааҕы XI куонкурустарыгар кыттар чиэскэ тиксибиттэрэ. Онно, куонкуруһу үөрүүлээхтик арыйыы сиэригэр таһырдьа Сайаана Гурьева “Айылҕа тыына” диэн композицияны хомуска оонньоон дьүрүһүтэн, Магадан олохтоохторун сөхтөрбүт.
– “Магаданский хрусталь” диэн норуоттар икки ардыларынааҕы XI куонкуруска уруккуттан үөрүйэхтээх, дьоҕурдаах оҕолор түмсэн күрэхтэстилэр. Ахсынньы тымныытыгар тоҥору-хатары билиммэккэ, туруулаһан туран, сарсыарда 10 чаастан киэһэ аҕыска, аҕыс аҥаарга диэри күүстээхтик үлэлээбиппит, – диир Сайаана.
Ол түмүгэр, Мария Гуляева-Туойа уһуйар кыргыттара “Дьол” диэн композицияларынан “Юный скульптор” номинацияҕа I миэстэни ылан, кыайыы үөрүүтүн билбиттэр. Кыргыттары сэргэ, эмиэ бу оскуола иитиллээччилэрэ, Н.Д. Колодезников салайар уолаттара Сергей Никифоров, Конон Кириллин “Встреча солнца” үлэлэринэн эмиэ бастаабыттар. Инньэ гынан, быйыл Саҥа дьыл кэнниттэн Л.А. Ким аатынан ойуулуур-дьүһүннүүр искусство оскуолатын иитиллээччилэрэ П.А. Ойуунускай аатынан Саха академическай тыйаатырыгар “Бал юных дарований” диэн улахан тэрээһиҥҥэ ыҥырыллан сырыттылар.
Билигин уус оҕолорбут муус устарга ыытыллыахтаах күрэххэ ханнык композицияны чочуйан таһааралларын толкуйдуу сылдьаллар.
Сайаана Гурьева ойуулара “Кэскил”, “Юность Севера” хаһыакка тахсыбыттара. Кини “Трансполярный экспресс” диэн тимир суолга анаммыт анаарыы куонкуруска уруһуйдаан бастаабыта, ол түмүгүнэн Францияҕа баран кэлбитэ. Аны “Юность Севера” хаһыат көҕүлээбит “Сэлиичээни ойуулаа” диэн уруһуй куонкуруһугар кыттан, биһиги хаһыаппыт кылаабынай эрэдээктэрэ Евдокия Иринцеева “Мэник сэлиичээн” диэн 3D киэптээх кинигэтинэн наҕараадаламмыта.
Жанна ЛЕОНТЬЕВА.