Бүгүн 6-с кылаас үөрэнээччилэрэ салайааччыбыт Анна Леонидовна Васильевалыын үөрэх кэннэ сэрии кэмин оҕотугар Алексей Игнатьевич Николаевка мас саһааныгар көмөлөстүбүт. Алексей Игнатьевич оҕо сааһа Аҕа дойду Улуу сэриитин кэмигэр ааспыт.
Кини маннык ахтар:
-Биирдэ көрдөхпүнэ, дьон бөҕө мустубут. Эдэр дьон куустуһан туран ытаһаллар, онтон аттарын миинэн күөл диэки ойуталлар. Сэриигэ бараллар эбит…
Аҕабыт ыалдьан суох буолбута. Мас эрбээһинэ, суорунаҕа бурдук тардыыта эдьиийим биһикки үлэбит этэ. Сайын окко оҕус сиэтиитигэр үлэлиирим. Кэнники холкуоспут бэрэссэдээтэлэ үчүгэй буолан, сэрии кэмигэр дьон хоргуйбатаҕа дииллэрин истэр этим.
Алексей Игнатьевич кэлин Ньурба Маарыгар СПТУ-га суоппар кууруһугар үөрэммит. Онтон ыла араас массыынаҕа холкуоска, сопхуоска үтүө суобастаахтык үлэлээн, сынньалаҥҥа олорор. Быйыл массыына уруулун туппута 65-с сыла. Кини биһигини кытта тэҥҥэ сылдьыста, кэлэн көмөлөспүппүтүгэр олус үөрдэ, махтанна.Сэрии кыттыылаахтарыгар, тыыл ветераннарыгар, сэрии кэмин оҕолоругар болҕомтолоох буолуохха.
Карина Новгородова, VI кылаас, «Эрчим» медиакиин, Үөһээ Бүлүү, Дүллүкү