Биһиги оскуолабытыгар төрөппүттэр Бүтүн Арассыыйатааҕы акцияҕа кыттан, биир кэлим эксээмэни (БКЭ) туттардылар. Бу тэрээһин быйыл 10-с төгүлүн ыытыллар.
Төрөппүттэр эксээмэн бары түһүмэхтэрин аастылар. Кыттааччылар нуучча тылыгар кылгатыллыбыт барыйааннары суруйдулар, 1 чаас үлэлээтилэр.Акция сүрүн сыала-соруга — психологическай тыҥааһыны туоратыы уонна эксээмэн ыытыллар бэрээдэгин ис өттүттэн көрдөрүү.
Акция муус устар 8-30 күннэригэр бары регионнарга ыытыллар. Төрөппүттэр аудиторияҕа регистрацияны, хонтуруолу, миэстэҕэ олордууну аастылар, бланкалары толордулар уонна эксээмэн матырыйааллара бэчээттэнэллэрин көрдүлэр, үлэни толордулар. Биһиги акция тэрийэччилэрин уонна төрөппүттэри кытта кэпсэттибит.
Альберт Вадимович Гаврильев, директоры үөрэх чааһыгар солбуйааччы:
— Төрөппүттэр бүгүн туох сыаллаах БКЭ туттаралларый?
— «День сдачи ОГЭ родителями» диэн Бүтүн Россиятааҕы акция буола турар. Төрөппүттэр экзамен ыытыллар бэрээдэгин билэн барыахтара. Ол чэрчитинэн, бүгүн саамай көхтөөх төрөппүттэрбит кэлэн кыттыыны ыллылар, түмүгүн билэн барыахтара.
— Төрөппүт оҕотун эксээмэнигэр киириэн сөп дуо?
— Төрөппүт, БКЭ-ҕэ көрүллэр ирдэбилинэн, экзамены кэтээн көрөөччү (наблюдатель) эрэ быһыытынан киириэн сөп.
— Төрөппүккэ оҕо БКЭ-ҕэ бэлэмнэнэр кэмигэр тугу сүбэлиэххиний?
-Оҕолорун улаханнык долгуппакка, бэлэмнэнэллэригэр сөптөөх усулуобуйаны тэрийэн, күүс-көмө буолалларыгар баҕарабын.
Галина Владимировна Габышева, төрөппүт:
-Хонтуруоллуур процедура хайдах ааста? (киириигэ төһө кытаанахтык бэрэбиэркэлээтилэр).
-Киирии ааҥҥа металл көрдүүр аппарат бэрэбиэркэтин аастыбыт, паспоры көрдүлэр. Ирдэбил быһыытынан.
— Матырыйааллары бэчээттээһин хайдах быһыылаахтык буолла?
— Үлэ матырыйаалын (КИМ) аудиторияҕа киирбиппит кэннэ инструктаж ааҕан баран бэчээттээн таһаардылар.
— Бланкалары толорууга дьиҥнээхтик төһө бириэмэ барбыта буолуой?
— 3-5 мүнүүтэ барда быһыылаах. Түргэн, буукубалары сөпкө суруйар оҕо ыарырҕатыа суох эбит.
Ирина Иннокентьевна Томская, төрөппүт:
— Видеонан кэтээн көрөр камералар бааллара дуо?
-Эксээмэн кэмигэр кылаас илин уонна кэлин өттүттэн камера устар диэн кэпсээтилэр.
— Оскуола программатын кытта тэҥнээтэххэ, сорудахтар төһө уустуктарый?
-Оскуола киэниттэн атына, уустуга суох. Барытыгар бириэмэ тиийэр эбит дии санаатым. Бириэмэ үксэ өйтөн суруйууга барыыһы.
Түмүккэ төрөппүттэргэ предмеккэ билии туһунан буолбакка, эксээмэҥҥэ ыытыллар тэрээһин уратыларын туһунан дьүүллэһэр мунньах ыытылынна. Акция түмүгүнэн, төрөппүттэр тэрээһин үлэ чуолкайдык ыытылларын көрөргө, сорудахтар оскуола программатыгар сөп түбэһэллэрин билэргэ көмөлөһөрүн, оҕолору эмоциональнай өттүнэн үчүгэйдик бэлэмнииргэ туһалаахтарын бэлиэтээтилэр.
Айыына Петрова, 9 кылаас, Сааскыйа Васильева, 11 кылаас, «Эрчим» медиакиин, Дүллүкү орто оскуолата, Үөһээ Бүлүү