Ахсынньы 14 күнүгэр Дьокуускайга Арктикатааҕы судаарыстыбаннай култуура уонна ускуустуба үнүстүүтүгэр ыытыллыбыт «Культурно-исторический код Нюрбинского района: люди, бренды, стратегия развития» диэн кэмпириэнсийэҕэ кыттан 1 истиэпэннээх дипломант буоллум. Дакылааппын култуура уонна духуобунай сайдыы миниистирэ А.М. Ноев анаан-минээн истэн, үрдүк сыанабылы биэрэн, инники чинчийиилэрбэр ситиһиилэри баҕарда.
Ахсынньы 5 күнүгэр Ньурбаҕа «Инникигэ хардыы» улуустааҕы научнай-чинчийэр кэмпириэнсийэ иһинэн М.С. Иванов-Багдарыын Сүлбэҕэ аналлаах «Багдарыын Сүлбэ ааҕыылара» буолан ааспыта.
Онно мин «Аҕа ууһум хос ааттара» диэн дакылаатынан кыттаммын 2 миэстэ буолбутум уонна Дьокуускайга Марха (Ньурба) улууһа тэриллибитэ 200 сылыгар аналлаах өрөспүүбүлүкэтээҕи научнай-чинчийэр кэмпириэнсийэҕэ кыттар рекомендация ылбытым.
Төрүччүбүн оҥорорбор өбүгэлэрим бары хос ааттаахтарын бэлиэтии көрөн, хос ааттарын чинчийэргэ санаммытым. Хос ааттарын чинчийэн өбүгэлэрим хайдах майгылаахтарын, тас көрүҥнэрин, үлэлэрин-хамнастарын, хаһан, ханна төрөөбүттэрин, хос ааттарын суолтатын туһунан биллим.
Ахсынньы 14 күнүгэр ыытыллыбыт «Культурно-исторический код Нюрбинского района: люди, бренды, стратегия развития» диэн кэмпириэнсийэҕэ араас дакылааттары көрөн-истэн элбэҕи биллим. Инникитин ийэм өттүнэн төрүччүбүн оҥорорго сорук туруоруннум, ол үлэбин оҥорорбор бу кэмпириэнсийэҕэ иҥэриммит билиим-көрүүм миэхэ төһүү күүс буолуо дии саныыбын.
Мин махтаныам этэ салайааччыбар, саха тылын учууталыгар Наталья Викторовнаҕа. Кини дакылааппын, төрүччүбүн оҥорорбор сүбэ-ама биэрэн, улахан көмө буолла.
Ньургун Николаев,
Ньурба улууһун П.С. Егоров аатынан Акана орто оскуолатын 7 кылааһын үөрэнээччитэ.
keskil14.ru