Муус устар 27 күнэ – Саха Өрөспүүбүлүкэтин күнэ! Бу үтүө, дьоро күн чэрчитинэн өрөспүүбүлүкэ үгүс оскуолаларыгар төрөөбүт дойдуну, төрүт култуураны убаастыырга, таптыырга үөрэтэр тэрээһиннэр киэҥник ыытылыннылар.
Холобур, биһиги А.В. Дмитриев аатынан Ой орто оскуолабытыгар үөрэнээччилэр уонна учууталлар өрөспүүбүлүкэбит историятыгар, сайдыытыгар анаммыт дириҥ ис хоһоонноох тэрээһиннэргэ көхтөөхтүк кыттыыны ыллылар. Бары кылаастарга анал кылаас чаастар ыытылыннылар, онно оҕолор Саха сирин былыргытын, аныгытын туһунан билиилэрин дириҥэттилэр, төрөөбүт дойдуларыгар тапталларын билиннилэр.
Ону таһынан, оскуола оҕолоро документальнай киинэни көрдүлэр. Саха сирин кэрэ айылҕатын, норуотун олоҕун-дьаһаҕын, биллиилээх дьонун туһунан киинэ кэнниттэн оҕолор сүргэлэрэ өрө көтөҕүлүннэ, омук быһыытынан киэн туттуу өйдөбүлэ күүһүрдэ.
Тэрээһин кэнниттэн, оскуола тиэргэнигэр көхтөөх флешмоб буолла. Үөрэнээччилэр бары бииргэ хомуһунан, сахалыы ырыалар дьүрүскэннэринэн хамсаннылар. Бу флешмоб биир сомоҕо буолуу уонна төрүт култуурабытыгар бэриниилээх буолуу бэлиэтэ буолла.
«Сахалыы иитии – омук кэскилэ» – төрөппүттэр мунньахтара
Бу күнү өссө дьоһуннаах оҥордо «Сахалыы иитии – омук кэскилэ» диэн тиэмэлээх төрөппүт мунньаҕа. Манна төрөппүттэр оҕону төрөөбүт тылынан иитии, “сыыппара ыарыытыттан” харыстааһын, билиҥҥи кэмҥэ оҕону сайыннарыы уратыларын туһунан сытыы кэпсэтиигэ кыттыыны ыллылар. Ыҥырыллыбыт экспертэр – психологтар, логопедтар, быраастар – көдьүүстээх сүбэлэри биэрдилэр.
Бу курдук тэрээһиннэр оҕоҕо төрөөбүт дойдутун өссө чугастык билэрэ, кинини таптыыра уонна киэн туттара наада. Өрөспүүбүлүкэ Күнэ – бу биһиги бары биир сомоҕо буоларбыт, биир сыалга дьулуһарбыт бэлиэтэ,
– диэн оскуолабыт дириэктэрэ, ытыктабыллаах Луиза Васильевна Корякина бэлиэтээн эттэ.
Оҕолору төрөөбүт дойдуларын устуоруйатыгар, култууратыгар сыһыарыы, патриотизмҥа иитии – ханнык да кэмҥэ наадалаах. Маннык тэрээһиннэр эдэр ыччакка төрөөбүт сирдэрин кэскилигэр эрэли, тапталы үөскэтэллэр, кинилэри кэлэр кэм дьоһун оҕолоро буолалларыгар кынаттыыллар. Саха Өрөспүүбүлүкэтин күнэ өрүү Саха дьонун сүрэхтэригэр сырдык уот буолан умайдын, инники кэскилгэ сирдээтин!
«Этин» медиа киин, Ой орто оскуолата, Хаҥалас