Муома мин ийэм төрөөбүт дойдута. Муома — хотугу дойду киэргэлэ. Муома сиригэр тиийдэххэ, киһи атын эйгэҕэ киирбит курдук буолар. Бу — тыйыс айылҕалаах, ол эрэн ис киирбэх кэрэ көстүүлээх дойду.
Аан бастакынан, харах далыгар Чыыстай хайалара (Черскэй сиһэ) дыргыйан тахсаллар. Кинилэр үрдүк чыпчааллара сылы быһа маҥан хаарынан бүрүллэн, күлүмүрдээн көстөллөр. Күн тахсыытыгар хайалар кыыһан, кыһыл көмүс өҥүнэн оонньууллара — туспа остуоруйа. Онтон Муома өрүһэ — Индигиир. Кини уута ырааһынан, сүүрүгэ тургэнинэн, тупсаҕайынан аатырар. Өрүс кытылыгар турар Улахан Тарын (муус үөскээбит сирэ) киһини сөхтөрөр. Сайыҥҥы куйааска муус уулла охсубат, ол — Муома айылҕатын биир дьиктитэ. Муустан тахсар тымныы салгын киһини сөрүүкэтэр, өйүн-санаатын ыраастыыр курдук. Бу дойду кэрэтин, кини тыйыс эрээри истиҥ айылҕатын тылынан ойуулуур уустук. Бэйэ хараҕынан көрүөххэ, салгынын тыыныахха наада.
Муома — Саха сирин саамай кистэлэҥнээх уонна кэрэ муннуктарыттан биирдэстэрэ. «Победа» диэн саамай үрдүк хайа Муомаҕа баар. Мин Муомаҕа сылдьан дьикти айылҕаны көрөрбүн олус ордоробун. Эбэлээх, эһэм дьикти кэрэ айылҕалаах сиргэ олороллор. Айылҕаларын, төрөөбүт дойдуларын курдук үтүө дьон. Кинилэргэ уһун үйэни, кытаанах доруобуйаны баҕарабын.
Сардаана Васильева, Игидэй орто оскуолатын 8 кылааһын үөрэнээччитэ.
Салайааччы: Ефимова В.К., саха тылын уонна литературатын учуутала.
Кэскил14.ру