“Кэскил” уонна “Юность Севера” хаһыаттарга 2018 сыл I аҥаарыгар суруйтарбыт ааҕааччыларбытыгар анаан, тохсунньу 24 күнүгэр «Бэчээт дьиэтигэр» лотерея ыытылынна.
Быйыл хаһааҥҥытааҕар да элбэх киһи кытынна. Барыта – 882 квитанция киирбитэ. Амматтан, Уус Алдантан, Мэҥэ Хаҥаластан, Чурапчыттан, Томпоттон, ону таһынан ыраах Дьааҥыттан тиийэ суруйтарбыттар бааллара. Сорохтор бүтүн кылааһынан кыттыбыттарын иһин, кылаас салайааччытын аата эрэ киирбитэ.
Саҥа IT үйэтэ кэлэн, Интэриниэт нөҥүө кыайыылаахтары таларга, элбэх сыыппараттан биири эрэ ойутан таһаарар “генератор случайных чисел” бырагырааманы туһанныбыт.
“Кэскил” оҕо бэчээтин кыһата бу лотереяҕа планшет, диктофон, экшн-камера уонна ноутбук курдук сыаналаах бириистэри туруорбута.
Лотерея быһа биэриигэ уһуллубута. Ону ЯСИА саайтыгар киирэн көрүөххэ сөп.
Дьэ эрэ, доҕоттоор, кыайыылаахтарбыт ааттара манныктар:
“Presti-gio” планшет хаһаайкатынан Надя ВИНОКУРОВА буолла. Кини Өймөкөөн Н.О. Кривошапкин аатынан орто оскуолатын үөрэнээччитэ.
Иккис бирииспит “SJCAM” экшн-камера. Ону Амма улууһун Сулҕаччы бөһүөлэгиттэн Ирина Семеновна СЛЕПЦОВА, “Эрэл” пост салайааччыта, ылла.
Саҥаҕын тута устар “Ritmix” диктофон Таня КОКОРЕВАҔА түбэстэ. Кини Кэбээйи орто оскуолатын X кылааһыгар үөрэнэр.
Аатырбыт “Prestigio” планшеты Люция Филипповна СКРЯБИНА ылла (Майа, Мэҥэ Хаҥалас).
Дэбигис туттарга аналлаах “MAX Q71” колонка Кирилл ЗАБОРОВСКАЙГА түбэстэ (Боронук, Дьааҥы, “Сиккиэр” пост).
Иккис “Ritmix” диктофону Варвара Прокопьевна ТАСТЫГИНА ылла (Майа, Мэҥэ Хаҥалас).
Көмпүүтэргэ аналлаах ковригы, мышканы уонна наушнигы Дьокуускай куорат Саха гимназиятын IV “А” кылааһын үөрэнээччитэ Паша ПЕСТРЯКОВА сүүйдэ.
Лотерея сүрүн бирииһэ ноутбук хаһаайынынан Маша Баишева буолла. Мэҥэ Хаҥалас улууһун Майа В.П. Ларионов аатынан орто оскуолатын VIII кылааһын туйгун үөрэнээччитэ.
Бириистэри Дьокуускай к., Орджоникидзе уул. 31-тэн, 204-с кэб. ылаҕыт.
Бэйэҕитин кытта пааспар, СНИЛС, ИНН куоппуйаларын илдьэ кэлэргитин умнумаҥ.
Кыайыылаахтарбытын эҕэрдэлиибит!
Иннокентий ВЛАДИМИРОВ.
ХААРТЫСКАҔА: «Сурутуу-2018» сыл лотереяҕа сүүйбүт Майа В.П. Ларионов аатынан орто оскуолатын үөрэнээччилэрэ Маша Баишева (VIII кылаас), Настя Тастыгина (V кылаас).