Бүгүн, балаҕан ыйын 1 күнүгэр, биһиги Майатааҕы лицейбит үөрэнээччилэригэр аанын тэлэччи аста. Бу үөрэх сылыгар лицей саҥа 5-с уонна 7.2 кылаастарга оҕолору ылла.
Күн кылаас чааһыттан саҕаланна, үөрэнээччилэр кылаас салайааччыларын кытта саҥа үөрэх сылын торумнарын былааннаатылар. Онтон үөрүүлээх линейка аһылынна.
Торжественнай линейка Россия судаарыстыбаннай былааҕын таһаарыытынан уонна Российскай Федерация өрөгөй ырыатын толоруутунан саҕаланна. Кэлэр үөрэх сыла ситиһиилээх, таһаарыылаах буоллун диэн олус үчүгэй алгыс тыллара этилиннилэр.
Эҕэрдэ тылынан оскуола дириэктэрэ Попова Татьяна Спартаковна, МР «Мэҥэ-Хаҥалас улууһа» баһылыгын 1-кы солбуйааччы Толстяков Г.Н., Майа сэлиэнньэтин тыа сирин сэлиэнньэтин баһылыгын солбуйааччы Игнатьев Д.А., Мэҥэ-Хаҥалас РУО отделын начальнига Кривошапкин Р.М. тыл эттилэр. Лицей быйылгы выпускнига, «Үрдэл» үөрэнээччилэр Сүбэтин бэрэссэдээтэлэ Роман Брызгалов эҕэрдэ тылынан эмиэ тыл этэн ааста. Бары үөрэх – ыарахан да буоллар, үөрүүлээх уонна кэрэхсэбиллээх үлэ буоларын бэлиэтээтилэр, саҥа үөрэх сыла барыларыгар чаҕылхай уонна таһаарыылаах буолуохтун, айымньынан, кэрэхсэбиллээх уонна туһалаах буолуохтун, оҕолору да, кинилэр педагогтарын да духуобунай, өй кыаҕын өттүнэн байытыахтын диэн баҕардылар.
Лицейбит дириэктэрэ Попова Татьяна Спартаковна эҕэрдэ тылы эттэ. Кини үөрэнээччилэргэ уонна учууталларга саҥа үөрэх сылын саҕаланыытынан ситиһиилэри баҕарда. Сайыҥҥы сынньалаҥ түмүгүнэн араас таһымнаах олимпиадаларга, норуоттар икки ардыларынааҕы кэмпириэнсийэлэргэ ситиһиилээхтик кыттыбыт үөрэнээччилэргэ дипломнары туттарда. Ону тэҥэ, учууталларга үчүгэй үлэлэрин уонна оройуон сайдыытыгар киллэрбит кылааттарын иһин махтал суруктарынан туттарда.
Технологическай эйгэҕэ уһулуччу ситиһиилэри оҥорбут үөрэнээччилэргэ Майа лицейин саха тылын уонна литературатын учуутала Слободчикова Т.Е., физика учуутала Никитин П.А., Бөтүҥ орто оскуолатын физико-математическай кылааһын 1979 сыллааҕы выпускниктара — 2026 сыллааҕы выпускниктарга профильнай математикаҕа, физикаҕа үрдүк көрдөрүүлэрин иһин Гермогенов Валерийга, Дьячков Воваҕа, Билюкина Лидаҕа, ону таһынан ОГЭ-ҕа үрдүк көрдөрүүтүн иһин Ефремов Дмитрийгэ анал истипиэндийэлэри туттардылар – бу күн ураты түгэнинэн буолла.
Үгэс быһыытынан, линейкаҕа лицей боруогун аан бастаан атыллаабыт биһиги 5 уонна 7-2 кылаастарбытын билиһиннэрдибит. Бу сылга 5-с кылааска 24 үөрэнээччи, 7.2-с кылааска 22 үөрэнээччи киирдэ. 5-с, 7.2-с кылаастар салайааччыларынан нуучча тылын уонна литературатын учуутала Иосифова М.М., музыка учуутала Чупрова З.Ю., биология учуутала Исакова М.К., история уонна обществознание учуутала Уваровскай М.Л. буоллулар.
Бу бырааһынньыктаах күн сүрүн түбэлтэтэ – бастакы чуораан. Кини дьиэрэҥкэйдээн тыаһааһына барыларыгар оскуолаҕа, паартаҕа олорор кэм кэлбитин санатта. Чуорааны чуорааҥнатар чиэс оскуола быйылгы выпускнигар, кыһыл көмүс мэтээлгэ кандидатка, Бүтүн Россиятааҕы политехническай олимпиада призерыгар, РАН академига М.П. Лебедев академическай истипиэндийэтин стипендиатыгар Игорь Васильевка уонна 5-с кылаас үөрэнээччитигэр Алтана Неустроеваҕа бэрилиннэ.
Саҥа үуммут үөрэх дьыла хас биирдии лицей үөрэнээччитигэр уонна педагогар билии суолугар саҥа ситиһиилэри, чаҕылхай кыайыылары аҕаллын, таһаарыылаах буоллун. Бырааһынньыгынан, Билии күнүнэн!
Хаартыскаларга ссылка – https://vk.ru/album-217282117_310644493
Суруйда Мусьяна Попова, 9 кылаас үөрэнээччитэ
Устубуттар Милена Игнатьева, Амелия Банчина, 10 кылаас, Сандаара Терентьева, 8 кылаас
И.Г. Тимофеев аатынан Майатааҕы лицей