Оскуолабыт иһинэн үлэлиир медиа-киин бырайыак күрэҕэр кыайан, ыам ыйын 27 күнүттэн «Бүлүү дуораана» лааҕыр биэс блокка арахсан үлэлии сылдьар.
Бастакы күҥҥэ биһиги билсиспиппит уонна оонньообуппут. Учууталларбыт Валентина Петровна, Сандаара Игоревна, Александр Валентинович лааҕыр туһунан уонна инники былааннары кэпсээбиттэрэ. Иккис күҥҥэ биһиги табаарыспын Диманы кытта ГТО нуорматын туттарар дьонтон интервью ылбыппыт.Ыраах Өлөөнтөн кэлбит ыалдьыттары көрсүбүппүт. Үһүс күҥҥэ биһиги оскуолабыт оҕолоруттан ГТО нуорматын туттарбыттарын туһунан интервью ылбыппыт. Бэйэбит эмиэ ГТО нуорматын туттаран көрбүппүт. Нуучча тылын учууталын кытта Валентина Петровналыын хаһыат оҥорбуппут, ыстатыйа суруйбуппут, онтон принтерынан таһаарбыппыт. Ыстатыйалары кырыйбыппыт уонна баатмаҥҥа сыһыарбыппыт. Хаһыаппытын атын лааҕыр оҕолоругар, учууталларга кэпсээбиппит.
Бэһис күҥҥэ саха тылын учуутала Августина Аркадьевналыын архыыпка барбыппыт. Онно биһиги бастакы оскуола туһунан матырыйаал көрдөөбүппүт уонна булан баран хатыскалаабыппыт. Алтыс күҥҥэ саха тылын учуутала Туйаара Васильевналыын эмиэ архыыпка үлэлээбиппит. Ону таһынан, Ньурбатааҕы киин библиотекаҕа барбыппыт уонна Дмитрий Кононович Сивцев-Суорун Омоллоон туһунан видео устубуппут.Үлэбит өссө да элбэх.Улахан кылаастар Александр Валентиновичтыын велосипедынан Ньурбаҕа чугастыы сытар нэһилиэктэринэн кэрийэ сылдьан ахтыы усталлар, ылаллар.Эһиил Ньурбаҕа буолар оонньууларга волонтердуубут. Ол чэрчитинэн, Антоновкаҕа буолбут Өрөспүүбүлүкэтээҕи Аэробика күрэҕэр волонтердаабыттара.
Лааҕырбыт сотору түмүктэниэ. Учууталларбар махтанабын илдьэ сылдьан миигин барытыгар үөрэттилэр. Сайыммыт олус туһалаахтык саҕаланна!
Слава ИВАНОВ,
VI «А» кылаас,
Ньурба элбэх хайысхалаах гимназията