Балаҕан ыйын 25 күнүгэр, Дьокуускай куорат 17№-дээх орто оскуолатыгар, Саха Өрөспүүбүлүкэтин Судаарыстыбаннаһын күнүгэр аналлаах линейкэ буолла. Бу тэрээһин Аҕа дойду Улуу сэриитин сылларыгар саха омугун хоргуйан өлөртөн быыһаабыт, сэллик ыарыыны тохтотор суолга киллэрбит, Саха Сирин автономиятын 1947 сыллаахха быһаары гыммыттарын көмүскээбит өҥөлөөх Саха Сирин уһулуччулаах салайааччыта — Илья Егорович Винокуров аатынан сквергэ ыытылынна. Манна оскуола үөрэнээччилэрэ, үлэһиттэрэ уонна ыалдьыттар кыттыыны ыллылар.
Ол курдук Саха Өрөспүүбүлүкэтин ыччакка миниистирэ, Максимов Александр Григорьевич, оскуолабыт директора, Чиряев Анатолий Николаевич уонна саха тылын уонна литэрэтиирэтин учуутала, Попова Мария Матвеевна манна мустубут үөрэнээччилэргэ, ыалдьыттарга төрөөбүт дойдуга тапталы, республика историятын уонна култууратын суолтатын туһунан истиҥ санааларын эттилэр. Илья Егорович олорбут олоҕор тугу үлэлээн ситиспитин, сахабыт норуотун инники сайдарын туһугар үгүс суолталаах туруорсууларын билсиһиннэрдилэр.
Салгыы 7 «б» кылаас үөрэнээччилэрэ Наталья Михалева — Сайа тылыгар, Ангелина Файрушина мелодиятыгар «Сахам сирэ» ырыаны ыллаатылар. Манна Ангелина Егоровна төрөппүт сиэнэ Тимур Пермяков солистаата. Ырыа бу өрөгөйдөөх күҥҥэ анаммыт курдук олус истиҥник ылланна. Түмүккэ бары үөрэнээччилэр, ыалдьыттар Илья Егорович Винокуров пааматынньыгар сибэкки уурдулар.
Бу тэрээһин биһиэхэ, үөрэнээччилэргэ Өрөспүүбүлэкэбит историятын, култууратын уонна төрүт үгэстэрин өйдүүргэ, харыстыырга өссө эбии саҥа санаалары, толкуйдары киллэрдэ.
Яна Васильева, Дьокуускай куорат 17 №-дээх орто оскуола 10 «В» кылаас үөрэнээччитэ