Бүгүн муус устар 8 күнүгэр С.Н. Донской – II аатынан Үөрэҕи сайыннарар уонна идэ таһымын үрдэтэр институкка IV төгүлүн ыытыллар «Төрөөбүт тыл уонна төрөөбүт литература бастыҥ учуутала — 2025» күрэс үөрүүлээх арыллыыта буолла.
Уопсайа 17 учуутал өрөспүүбүлүкэ араас муннуктарыттан кэлэн кыттыыны ыла сылдьаллар. Олөөн, Уус Майа, Өймөкөөн курдук хоту улуустартан кыттааччылар бааллар. Быйылгы күрэскэ икки эбэҥки тылын уонна литературатын учууталлара кыттыахтара.
Күрэс үөрүүлээх арыллыытыгар СӨ Үөрэх уонна наука миниистирин солбуйааччы Степан Андреевич Степанов бэйэтин эҕэрдэтин эттэ: «Саха сиригэр государственнай программа иһинэн төрөөбүт тыллары сайыннарыыга үлэ бара турар. Ил Дархан этиитигэр олоҕуран, кини туруорбут сыалы ситиһэр баҕаттан биһиги бу сылга кэккэ быһаарыныылары ылыныахтаахпыт. Ол иһигиэр олус элбэх тэрээһиннэр бааллар, ол курдук: учууталлар идэлэрин үрдэтии, олимпиадалар, араас күрэхтэр, научнай-практическай конференциялар. Уонна оскуолаларга сөптөөх эйгэ баар буоларын наадатыгар биһиги бэйэбит эмиэ этиилэрбитин киллэриэххэ дииэн сорудахтаатылар. Ону биһиги эмиэ ылынныбыт. Цифровизацияҕа, платформалары арыйыыга эмиэ туспа болҕомто ууруллар. Правительстово таһымыгар ылынар тэрээһиннэрбит төрөөбүт тыл учууталлара суох хайдах да ылынар кыаҕа суох. Ол иһин бүгүн биһиги эҕэрдэлиибит уонна махтал тылларбытын тиэрдэбит ытыктабыллаах учууталларга«.
С.Н. Донской – II аатынан Үөрэҕи сайыннарар уонна идэни үрдэтэр институт дириэктэрэ Ньургун Михайлович Павлов: «Бу күрэс биһиэхэ төрдүс төгүлүн ыытыллар. Түөрт сыл устата биһиэхэ төрөөбүт тыл учууталлара бу күрэскэ кыттан, уопут атыстаһан, бэйэлэрин көрдөрөн өрөспүүбүлүкэлэрин Арассыыйа таһымнаах күрэскэ ситиһиилээхтик, чиэстээхтик көмүскээн тураллар. Бу күрэс сүрдээх наадалаах буолар. Киһиэхэ төрөөбүт тылын билиитэ, сүрүн суолталааҕын бары өйдүүбүт. 2022 сыллаахха 6 кыттааччы баар эбит буоллаҕына быйыл 17 кыттааччы кэлбититтэн олус үөрэбит«.
Бастыҥ төрөөбүт тыл уонна литература учууталлара үс күн устата бастакы түһүмэххэ бэйэлэрин методикаҕа маастырыстыбаларын көрдөрүөхтэрэ, аһаҕас уруоктары ыытыахтара, иккис түһүмэххэ маастар кылаастары уонна кылаас чаастарын ыытыахтара.
Keskil14.ru