Ханнык баҕарар дьиэ кэргэн тумус туттар өбүгэлээх, киэн туттар киһилээх буолар. Дьиэ кэргэн күнүн көрсө Г.Г. Софронов аатынан Өлөөкө-Күөл орто оскуолатын үөрэнээччилэрэ ол туһунан бэйэлэрин санааларын үллэстэллэр. Оҕолор тугу кэпсииллэрий?
Игнат Винокуров, 8 кылаас: «Биһиги дьиэ кэргэммитигэр 9 оҕо, 2 сиэн баар. Аҕам Владимир Иннокентьевич уон оҕолоох ыалга төрөөбүтэ. Онон мин эбэм Екатерина Митрофановна Герой Ийэ. Биһиги эбэбитинэн киэн туттабыт. Элбэх аймахтаах, уруулаах буолар үчүгэй дии саныыбын.»
Арылхан Винокуров, 8 кылаас: «Биһиги дьиэ кэргэммит Винокуров Егор Иванович аатын өрө тутар. Кини мин хос эһэм буолар. Эһэм төһө да сэриигэ сылдьыбатар, кини сэрии кэмигэр ыарахан олоҕу олорон ааспыт. Тыыл бэтэрээнэ этэ. Колхоз үлэтигэр күнүстэри-түүннэри харыстаммакка үлэлээбитэ. Барыта фронт туһугар диэн. Ол үлэтин иһин наҕараадалардаах. Онон биһиги хос эһэбитинэн киэн туттабыт».
Люба Еремеева, 8 кылаас: «Мин дьиэ кэргэммэр эһэм да, эбэм да өттүнэн үтүө дьон олорон ааспыттар. Ол гынан баран, тумус туттар киһибитинэн эһэм өттүнэн аймах хос эһэм Софронов Гавриил Георгиевич буолар. Кини буойун учуутал этэ. Илимниир оскуолатыгар учууталлаабыт, онтон бэйэтэ тылланан сэриигэ барбыт. Сэриигэ снайпердаабыт. Тыыннаах эргиллэн кэлэн салгыы үөрэхтээһиҥҥэ үлэлээбит. Булчут, балыксыт, дуобатчыт, суруйааччы. Эргиччи талааннаах киһи эбит. Мин кини аатынан оскуолаҕа үөрэнэрбиттэн, аймаҕым буоларыттан олус үөрэбин уонна киэн туттабын. Кини курдук Патриот буола улаатарга кыһаллабын».
Эрхан Созонов, 8 кылаас: «Биһиги аймахпыт АБДь сылдьан сырдык тыына быстыбыт Созонов Михаил Прокопьевиһы киэн тутта ааттыыбыт. Аҕабыт убайым биһиги иккигэ куруук Михаилы холобур оҥорор. «Убайгыт курдук буоларга кыһаллыҥ» диир. Убайбыт мэтээллэрин, сылдьыбыт сэриитин туһунан кэпсиир. Онон биһиэхэ убайбыт Миша Герой буолар.»
Сааскылаана Бубякина, 7 кылаас: «Дьиэ кэргэним киэн туттар киһитэ — Бубякин Василий Спиридонович. Кини мин эһэм буолар. Эһэм тыыл бэтэрээнэ, уһун кэмҥэ тыа хаһаайыстыбатыгар үтүө үлэтин иһин элбэх наҕараадалаах, механизатор, РФ суруналыыстарын сойууһун чилиэнэ этэ. Эһэм дьиэ кэргэнигэр соҕотох уол буолан, балтыларын иитиһээри кыра сааһыттан үлэлээбит. Колхоз араас үлэтигэр сылдьан оскуолатын үөрэнэн бүтэрбит. Кырдьар сааһыгар дылы үлэлээбитэ. Кэлин бочуоттаах сынньалаҥҥа тахсан баран, улуустааҕы «Халыма долгуннара» хаһыакка ыстатыйа суруйар этэ. Хас да кинигэлээх. Эһэм ыарахан олоҕу туораан биллэр суруйааччы буолбутун олус биһириибин, ол иһин биһиэхэ кини герой тэҥэ киһи буолар».
Эмилия Заболоцкая, 7 кылаас: «Мин дьиэ кэргэним киэн туттар геройа — мин хос-хос-хос-хос эбэм Явловская Екатерина Васильевна. Кини 17 сааһыгар туундараҕа буурҕаҕа түбэһэн, атын куоттаран аһаҕас халлаан анныгар 9 күн сыппыт. Хаар тибэн кэбиспит. Онно эбэм барахсан өлбөккө, үлүйбэккэ тыыннаах хаалбыт. Ол иһин кинини Тимир Кэтириинэ диэн ааттаабыттар. Хаар анныттан эбэбин эдэр уол булан, кэлин кэргэн ылан, 9 оҕону төрөтөн быр бааччы олорбуттар. Мин Тимир Кэтириинэ бэһис көлүөнэ ыччата буолабын. Хос-хос-хос-хос эбэбит олоххо тардыһыыта, айылҕаттан баардааҕа, санаата күүһэ биһиэхэ холобур буолар. Биһиэхэ кини Герой, ол иһин киэн тутта ааттыыбыт».
Сайаана Созонова, 7 кылаас: «Биһиги аймахха киэн туттар киһибит — Созонов Игорь. Кини мин убайым буолар. Биһиги ийэлэрбит бииргэ төрөөбүттэрэ. Убай Игорь хараҕынан инбэлиит да буоллар, кини спортсмен. Пауэрлифтиҥҥа биллэр чемпион. Элбэх мэтээллээх,кубоктаах. Эбэбит Надежда Митрофановна маннык сиэннээҕиттэн үөрэр, биһиэхэ убайбыт туһунан кэпсиир».
Юра Третьяков, 7 кылаас: «Биһиги дьиэ кэргэммит эһэм убайа Винокуров Иван Николаевиһынан киэн туттар. Кини Халыма сылгытын үөрэппит учуонай буолар. Халыма сылгыта диэн туспа боруода баарын дакаастаабыт. Сылгыһыттан саҕалаан учуонайга тиийэ улааппыт. Кини үөрэҕи олус убаастыыр үһү, хас да сааскар дылы үөрэниэхтээххин диир эбит. Бэйэтэ эмиэ куруук үөрэнэ сылдьыбыт. Биһиэхэ кини холобур буолар, биһиги кининнэн киэн туттабыт».
Вера Семенова: «Мин убайым Сережа АБДЬ барта. Убайбын наһаа ахтабын. Кини миэхэ Герой. Убайбынан киэн туттабын,күүтэбин».
keskil14.ru