Алтынньы 8 күнүгэр оскуолабытыгар Учуутал күнүгэр анаммыт тэрээһиннэр чэрчилэринэн Дублёр күнэ, ол эбэтэр үрдүкү кылаас үөрэнээччилэрэ учууталлары солбуйан күммүтүн сэргэхтик атаардыбыт.
Бу күн литература, математика, саха, нуучча тылларын, биология, история, музыка о.д.а. уруоктар күн аайы курдук буолбакка, чыҥха атыннык ыытылыннылар, тоҕо диэтэр бу күн оҕолору учууталлар буолбакка, оскуоланы быйыл бүтэрэр 11 кылаас үөрэнээччилэрэ дьоһуннанан туран үөрэтиллэр.
Ол курдук, мин бу күн учуутал идэтэ ыараханын, ол эрэн интэриэһинэйин эппинэн-хааммынан биллим диэхпин сөп. Бэйэм бу идэни уруккуттан сөбүлүүр буоламмын, ордук долгутуулаах этэ. Уруоктарбар эрдэттэн бэлэмнэнэн, 8-9 кылаастарга омук тылын уонна биология уруоктарын ыытан холоннум. Оҕолор үксүлэрэ истигэннэр, уруокка үлэлииллэр, ол эрэн син биир, ханна да буоларын курдук, 1-2 сүрэҕэлдьиир оҕо баара биллэр.
Оҕолору интэриэһиргэтээри тиэмэни кэпсээн бараммын, оонньуу технологиятын киллэрбит буоламмын, оҕолор олус сөбүлээтилэр.
Туох ыарахаттары көрүстүм?
Учуутал идэтэ – ыарахан эбит. Оҕо барыта биир тэҥник өйдөөбөт, ким эрэ бытаан, ким эрэ түргэнник ылынар. Маны таһынан хас биирдии үөрэнээччини кытта уопсай тылы булуохха наада. Уруок тиэмэтэ олус ыарахан буоллаҕына, тиийэр гына судургутук быһаарыахха уонна бэйэ икки ардыгар сыһыаҥҥа үлэлэһиэххэ наада эбит диэн түмүккэ кэллим.
Уруогу таһынан дублёр-учууталлар сүбэ мунньахтаабыппыт, тус санаабытын үллэстибиппит. Егор Данилов, директоры иитэр үлэҕэ солбуйааччы, уопсай линейка ыыппыта, ааспыт нэдиэлэ түмүктэрин билиһиннэрбитэ. Үксүбүт төһө да кыра ыарахаттары көрүстэр, күннэрин олус интэриэһинэйдик атаардыбыт диэтилэр.
Түмүккэ «оскуолабыт директора» Денис Лепчиков: «Таак, учууталлар кэллибит, хамнас суох, но вы держитесь!», — диэн дьээбэтэ барыбытын күллэрдэ.
Бу күнү хаһан да умнуохпут суоҕа. Бу күн хайабытыгар эрэ инники талар идэбитигэр көмө буолуо диэн эрэнэбин!
Саргы ЛУГИНОВА, 11 кылаас үөрэнээччитэ,
«Дьоҕур» пресс-киин, Кэбээйи.