Быйылгы үөрэх дьыла балаҕан ыйын 1 күнүгэр Ой орто оскуолатыгар үөрүүлээхтик саҕаланна! Бу күн 27 кырачаан оҕо оскуола боруогун атыыллаан, билии дойдутугар бастакы хардыыларын оҥордулар.
Күн үтүө, сылаас күннээх буолан, хас биирдии үөрэнээччи уонна учуутал үөрэх саҕаланыытын кэрэхсэбиллээхтик көрсүбүттэрэ. Күн кылаас чаастарыттан саҕаламмыта. Оҕолор уһун сайын кэннэ бэйэ бэйэлэрин ахтыбыттар, истиҥник кэпсэппиттэр, учууталларын кытта көрсөн үөрүү бөҕө буолбуттар.
Быйылгы дьыл уратыта диэн — саҥа 8 уонна 9 кылаастарга «медицинскэй» хайысха арыллыыта. Бу оҕолор медицина эйгэтигэр киирэн, доруобуйа туһунан дириҥ билиини ылыахтара.
Кылаас чаастар кэнниттэн бары оскуола тэлгэһэтигэр үөрүүлээх линейкаҕа тахсыбыппыт. Онно 11 кылаас үөрэнээччилэрэ 1 кылаас оҕолорун сиэтэн киллэрдилэр уонна баҕа санаалаах самолетиктары туттардылар.
Нэһилиэк баһылыга, оскуола дириэктэрэ, улуус үөрэх управлениетын салайааччылара кэлэн, оҕолору эҕэрдэлээтилэр уонна үөрэхтэригэр ситиһиилэри баҕардылар. Ону тэҥэ, Национальнай медицина киин дириэктэрин Станислав Николаевич Жирков аатыттан 1 кылаастарга бэлэх туттардылар.
Онон оҕолорго умнуллубат, сырдык, үөрүүлээх күн буолла! Саҥа үөрэх дьылыгар барыгытыгар үрдүк ситиһиилэри, билиигэ тардыһыыны уонна чэгиэн-чэбдик туругу баҕарабыт!
«Этин» медиа киин, Ой орто оскуолата, Хаҥалас