Эн тоҕо чөл олоҕу таларгын бэйэҕэр чопчулаатыҥ дуо? Чөл олох туох суолталааҕый?
Ити ыйытыыларга хоруйдаан өрөспүүбүлүкэ үөрэнээччилэрэ «Мы выбираем ЗОЖ!» диэн Дьокуускай куорат төрөппүттэрин Сэбиэтэ, СӨ Арыгы ырыынагын сүрүннүүр судаарыстыбаннай управлениета, Дьокуускай куорат Общественнай палатата, үөрэҕин салалтата, «Үргэл В» ХЭТ көҕүлүүр социальнай видеороликтары устууга өрөспүүбүлүкэтээҕи куонкурустарыгар кытыннылар.
Барыта 45 үлэ киирэн, дьүүллүүр сүбэ болҕомтотун тарта.
Бу куонкуруска үһүс сылын дьүүллүүр сүбэ чилиэнэ, «Үргэл В» продюсердыыр киин салайааччыта, «Тайна Чингис Хана» киинэ продюсера, «Александр Невский в Срединном мире» бырайыак ааптара, Россия үтүөлээх тренерэ В.Д. Иванов бэйэтин санаатын үллэһиннэ:
– Мин санаабар, сыл аайы куонкурус сайдан, үлэлэр ис хоһоонноро дириҥээн иһэр. Улуустартан, куораттартан бэрт интэриэһинэй үлэлэри оҕолор ыыппыттар. Хаартыскаҕа түһэрии, аудиовизуальнай технология, цифровой тиэхиникэ сайда турар кэмэ. Ити эйгэлэргэ оҕолорбут сысталлара эмиэ үчүгэй. Инникитин саха аатын норуоттар икки ардыларынааҕы түһүлгэлэргэ ааттатар дьон тахсыахтарын сөп. Оҕолор чөл олоҕу тутуһуу сиэрин кыра, эдэр саастарыттан өйдүү улааталлара суолталаах, арыгыттан, табахтан аккаастаналлара ордук. Киһи талара, умсугуйан дьарыктанара бу олоххо үгүс: спорт, уруһуй, ырыа, үҥкүү, тиэхиникэ, литература, о.д.а. Тус бэйэм Айыы Кыһатын Х «Б» кылааһын үөрэнээччилэрэ бэлэмнээбит роликтарын бэлиэтээтим, бириистэрбин кинилэргэ туттардым.
Жанна ЛЕОНТЬЕВА.
Ааптар түһэриитэ.