Бу күн саха норуотун дьылҕатыгар улахан суолталаах бэлиэ күн буолар. 1922 сыллаахха муус устар 27 күнүгэр Саха АССР тэриллибит күнүнэн билэбит. Ол түмүгэр саха норуота бэйэтин дойдутун, култууратын, тылын-өһүн сайыннарар кыахтаммыта.
Сүүстэн тахса сыл анараа өттүгэр улуу дьоммут Саха автономиятын туһугар туруулаһан, үгүс үлэни ыыппыт түмүктэригэр күн бүгүҥҥэ диэри саха норуота эстибэккэ, сүппэккэ, өссө сайдар-үүнэр суолунан баран иһэбит. Сахабыт норуотун чулуу дьонугар- Максим Аммосов, Платон Ойуунускай, Исидор Барахов, Степан Васильев уонна Степан Аржаков ааттарыгар билиҥҥи саха ыччата сүгүрүйүөх тустаахпыт.
Биһиги, Дьокуускай куоратын 17-с нүөмэрдээх орто оскуолатын үөрэнээччилэрэ, бу үөрүүлээх күҥҥэ Орджоникидзе болуоссатыгар Былатыан Ойуунускай пааматынньыгар тиийэммит бэлиэ тэрээһиҥҥэ кыттар чиэскэ тиксибиппит. Онно көрбүппүтүнэн, Өрөспүүбүлүкэбит Аҕа баһылыга Айсен Николаев уонна салалтабыт дьоно паааматынньыкка сүгүрүйэн тыыннаах сибэккилэри уурбуттара. П.А. Ойуунускай аатынан Саха академическай тыйаатырын артыыстара эмиэ кыттыыны ылбыттара. Кинилэр бу күн саха норуотугар туох сүҥкэн суолталааҕын күүстээх тылларынан бигэргэппиттэрэ. Бары сахалыы таҥастаах «тыыннаах коридор» буолан турбуппут олус истиҥник көстүбүтэ.
Биһиэхэ бу күн умнуллубат үөрүүнү, төрөөбүт дойдубутун уонна улуу төрүттэрбит илдьэ сылдьыбыт суолларын ытыктыыр, киэн туттар санааны аҕалла.
Третьякова Туйаара, Гоголева Нарыйаана, Дьокуускай куоратын 17 № орто оскуолатын 9 кылааһын үөрэнээччилэрэ, “Сайдын” медиакиин эдэр корреспонденнара.