Биһиги, Горнай улууһун С.И.Тимофеев-Кустуктаанап аатынан Маҥаны орто уопсай үөрэхтээһин оскуолатын 10-с кылааһын үөрэнээччилэрэ быйылгы үөрэх дьылыгар, Олунньу ый 13 күнүгэр Ийэ тыл сурук-бичик күнүн көрсө Маҥаныбыт нэһилиэгэр “Мин Ийэ тылым – Саха тыла” диэн доргуччу ааҕыыга бэрт сонун интэриэһинэй проект оҥорон ыыттыбыт. Бу проекпытыгар кылааспыт салайааччыта Вензель Ксения Анатольевна уонна нэһилиэк библиотекаря Алексеева Ньургустаана Васильевна тэрийэн ыытыстылар, ону тэҥэ оскуолабыт төрөппүттэрин Афанасьева Ньургустаана Васильевна салайааччылаах родкомитета буолан күүс көмө буолан тэрийэрбитигэр көмөлөстүлэр.
Бу күҥҥэ биһиэхэ Маҥаныбыт нэһилиэгин Кустук оҕо саадын иитиллээчилэрэ уонна үлэһиттэрэ, С.И.Тимофеев-Кустуктаанап аатынан Маҥаны орто уопсай үөрэхтээһин оскуолатын үөрэнээччилэрэ, учууталлара уонна төрөппүттэрэ, балыаһа үлэһиттэрэ, нэһилиэк админицтрациятын үлэһиттэрэ уонна бу проекка кыттыан баҕалаах нэһилиэк олохтоохторо модельнай библиотекаҕа кэлэн кытыннылар. Манна сарсыардаттан бары кыттааччылар сахалыы таҥастаах, сахалыы саҥалаах кэлэн кытыннылар. Оскуолаҕа проекпыт үөрүүлээх чааһын открытията линейканнаан саҕаланна, манна үөрэх чааһын завуһа, саха тылын учуутала Исакова Мария Егоровна саха тылын баайын кэрэтин туһунан тыл эттэ уонна 6 кылаас уерэнээччилэрин кытта “Төрөөбүт тыл” диэн хоһоону доргуччу аахтылар. Тьютор Артьемева Мариянна Яновна, төрөппүт Александрова Екатерина Андреевна эҕэрдэ тылларын эттилэр. Төрөппүттэрбит буһарбыт сып сылаас алаадьыларын тото-хана сиэтибит.
Бу үөрүүлээх линейка кэнниттэн үөрэнээччилэр бары кылааһынан тарҕаһан “Мин Ийэ тылым – Саха тыла” диэн, Доргуччу ааҕыы проекпыт саҕаланна. Кыра кылаастар остуоруйалары, орто улахан кылаас үөрэнээччилэрэ кэпсээннэри хоһооннору төрөппүттэрин уонна учууталларын кытта доргуччу аахтылар. “Кустук” оҕо саадыгар кыра, орто, улахан бөлөх оҕолоро уонна үлэһиттэрэ остуоруйа, хоһоон доргуччу ааҕан кытыннылар. Ону тэҥэ нэһилиэк администрациятын уонна олохтоох балыаһа үлэһиттэрэ активнай кыттыыны ыллылар. Нэһилиэк модельнай библиотекатыгар «Алаһа» түмсүү айар куттаахтара, ветераннара уонна нэһилиэк активистара көхтөөх кыттыыны ыллылар. Төгүрүк остуол тула ирэ-хоро кэпсэтэн, санаа атастаһан, кэнэҕэски үлэлэрин торумнаан, Клара Дмитриевна, Акулина Алексеевна бэйэлэрэ айбыт хоһооннорун доргуччу ааҕан иһитиннэрдилэр, Петр Гаврильевич бэйэтэ саха улуу суруйааччыларын туһунан доклад бэлэмнээн кэлбит, атын кыттааччылар кинигэттэн хоһоон, кэпсээн аахтылар. Бары үөрэн-көтөн, астынан тарҕастылар. Ааҕар кинигэлэрин эрдэттэн оскуола уонна нэһилиэк библиотекаларыттан уларсан аахтылар. Проекка барыта 161 киһи кытынна. Ийэ тылбыт суругун-бичигин күнүн көрсө Маҥаныбыт нэһилиэгэ “Мин Ийэ тылым – Саха тыла” диэн доргуччу ааҕан чугдаарыйа дуорайда. Бу курдук олус интэриэһинэй сонун тэрээһини ыытаммыт астынныбыт.Үлэбитин түмэн стенда оҥорон таһаарар былааннаахпыт, бу күҥҥэ кыттыбыт кыттаачыларбытыттан интерьвю ылан видеоролик оҥорон бэлэмнии сылдьабыт. Түмүктүүр күммүт киэһээтигэр оскуолабыт коллектива “Үлэ – үүнэр сайдар кэскилбит” диэн тэрилтэлэр икки ардыларынааҕы курэххэ кыттан, концерт көрдөрөн бочуоттаах бастакы миэстиэни ыллылар. Ийэ тыл сурук-бичик күнэ биһиги Маҥаныбыт нэһилиэгэр олус тэрээһиннээхтик буолан ааста.
Горнай улууһа С.И.Тимофеев-Кустуктаанап аатынан Маҥаны орто уопсай үөрэхтээһин оскуолатын 10 кылааһын уерэнээччилэрэ,кылаас салайааччыта Вензель Ксения Анатолльевна