Дьокуускай куорат 25№-дээх орто оскуолатын 5-в кылааһын үөрэнээччитэ Кэскилээнэ Санникова «Якутия с тобой» анал байыаннай дьайыыга көмөлөһөр штабка бэйэтэ мунньубут харчытынан паардаах өтүүгү атыылаһан уонна хас биирдии волонтерга бэйэтин уруһуйун бэлэх уунна.
Кэскилээнэ элбэх оҕолоох дьиэ кэргэн улахан кыыһа, кыра балыстара түөрт уонна алта саастаахтар. Аҕата Семен Дмитриевич Романов 2023 с. анал байыаннай дьайыыга баран, хомойуох иһин, суорума суолламмыта. Биир күн кыысчаан ийэтиттэн «аҕам барарыгар хантан таҥнан барбытай?» диэн ыйытар. Онно ийэтэ аҕалара барарыгар «Якутия с тобой» штаб иистэнньэҥнэригэр таҥаһын кээмэйин биэрэн, онно таҥас тиктэрэн, онтон таҥнан барбытын туһунан эппитэ.
Ыал ийэтэ Розалия Даниловна Эверстова кэпсиир:
— Кэскилээнэ кыратыттан, үс сааһыгар диэри, эбээ, эhээ тапталыгар уйдаран улааппыт оҕо, ону тэҥэ аҕа, ийэ тапталын тэҥҥэ иҥэриммит оҕобут. Бэйэбит Кэбээйи улууһун Чагда сириттэн силистээхпит. Кини кыратыттан олус амарах, уйан, аhыныгас сүрэхтээх. Сытыары сымнаҕас майгылаах буолан, кыратыттан дьоҥҥо эйэҕэс, айылҕаҕа чугас. Тапталлаах аҕата 2023 сыллаахха анал байыаннай дьайыыга барар. Кэскилээнэ, буола турары барытын өйдүүр буолан, аҕата суох буолбутун олус чугастык ылыммыта. Аҕабыт туһунан дьоҥҥо-сэргэҕэ киэн тутта кэпсиир буолбута. 2023 с. оҕом харчы мунньунар идэлэммитэ. Биирдэ аһыы олорон «Маама, паапа барарыгар ханнык волонтердартан таҥнан барбытай?» диэн ыйытта. Онно мин ТГ-каналбар «Якутия с тобой» штаб страницатын көрөрүн эппитэ. Ол күнтэн ыла бу тиэмэттэн тахсыбаттыы кэпсэтэр буолбуппут.
Аҕабыт барахсан барарыгар «Якутия с тобой» штабка таҥаһын кээмэйин биэрэн, мантан таҥнан барбыта. Кэскилээнэм ону билэн баран, хайаан даҕаны штаб волонтердарыгар тугунан эмит көмөлөһүөх буолбута. Биһиги «Защитники Отечества» пуонда нөҥүө штабы кытары сибээстэспиппит. Манна Полина Яковлевна көмөлөспүтэ. Ол курдук, биир үтүө күн оҕобун кытары «Якутия с тобой» штаб ыҥырыытынан онно тиийдибит. Кыыһым били мунньуммут харчытынан паровой өтүүк ылбытын бэлэхтээтэ. Уонна хас биирдии волонтерга бэйэтин уруһуйун туттартаабыта. Соһуйуохпут иһин, Кэскилээнэ уруһуйа хас биирдии үтүө санаалаах волонтерга барыларыгар тиксибитэ. Оҕом бу кэннэ, дьиэтигэр тиийэн, хараҕын уутун соттубута уонна «мин баҕа санаам туолла» диэн наһаа үөрбүтэ. Мантан ыла «Биһиги аҕабыт Дьоруой, кини аатын ааттата туруохпут» диэн күүүстээх ыра санааламмыта.
Кэскилээнэ билигин оһоллонон, балыыһаҕа эмтэнэ сытарын, ийэ киһи долгуйа иһитиннэрдэ. Биһиги Кэскилээнэҕэ түргэнник эмтэнэн үтүөрэ охсоругар, чэгиэн туругу, туйгун үөрэҕи, баҕа санаата барыта туоларыгар баҕара хаалабыт.
Кэпсэттэ Анна СЛЕПЦОВА.
Кэскил14.ру