Былыр да, билигин да саҥаны айар, тобулар, олоххо киллэрэр туруу, мындыр дьон баара, баар. Оттон оннук «рационализатор» дьону түмэр, кинилэр толкуйдарын олоххо киллэрэр аныгы тэрилтэ—Технопаарка!
Аныгы олох түргэн тэтимнээхтик, балысханнык сайдар. Биэс сыл анараа өттүгэр Сахабыт сиригэр «Якутия» Технопаарка курдук инновационнай кластер сайдыа диэн ким да тымтыктанан көрбөтөҕө. Ону баара, Технопаарка хаһан төрүттэниэҕиттэн сүүһүнэн мөлүйүөн сууммалаах табаары оҥорон таһаарар 91 хампаанньаны кынатын аннынан илдьэ сырытта, сорохторун көччөх гына көтүттэ.
2012-2016 сс. 1 млрд. 144 мөлүйүөн суумалаах табаары уонна өҥөнү оҥорон таһаарда. 260 мөлүйүөн нолуогу төлөөтө, 450 үлэ миэстэтин таһаарда. Ол курдук, манна Led-лаампалары, уһуннук барар хочуоллары, дьиэҕэ-уокка аналлаах сууйар-сотор булкааһыктары, таҥас сууйар бороһуогу, мыылалары, сиэп төлөпүөннэригэр, гаджеттарга сөптөөх оонньуулары, сыһыарыылары, кырааскалыыр матырыйааллары, о.д.а. оҥорон таһаараллар.
Технопаарка—муҥутуур билии, үөрэх, наука уонна оҥорон, айан таһаарыы килбэйэр киинэ. Саамай сүрүнэ, манна киһи ис кыаҕа, айар-тутар дьоҕура муҥутуурдук арыллар.
Резиденнэр
Технопааркаҕа сылдьан, хайа да бэйэлээх тимир илииһи кумааҕы курдук быһан кэбиһэр станогу сөҕө көрбүппүт, итини баһылаабыт Иннокентий Ураны көрсүбүппүт. Иннокентий значок, сувенир халыыбын элбэҕи бэлэмниир. Кини туһунан сиһилии хаһыакка сырдатыахпыт.
Атын резиденнэр, холобур, «Эгопласт» ХЭТ тымныыны тулуйумтуо, бөҕө-таҕа, пластик турбалары оҥорон таһаарар. Инньэ гынан, даачаҕа, дьиэҕэ-уокка диэн, улуус дьаһалталара эмиэ элбэх пластик турбаны үлэһэн, атыылаһан бараллар эбит. Күҥҥэ 1 км уһуннаах турбалар оҥоһуллаллар.
Оттон «Теплый край» диэн тэрилтэ резиденнэрэ түннүктэри, стеклопакеттары оҥороллор. Сменаҕа 200 пакеты оҥороллор.
Үөрэнээччилэргэ эмиэ аһаҕас
«Якутия» Технопаарка аана үөрэнээччилэргэ эмиэ аһаҕас. Ардыгар оскуола оҕолоро бэрт интэриэһинэй бырайыактары толкуйдаан, Технопаарка резиденнэрин соһуталлара, үөрдэллэрэ диэн эмиэ баар. Холобур, бу сайын Маҥан орто оскуолатын VII кылааһын үөрэнээччитэ Саша Григорьева үс бырайыагы бэлэмнээн, Технопаарка көҕүлээбит куонкуруһугар кыттан бэлиэтэннэ.
—Маннык үчүгэй куонкурус туһунан «Якутск вечерний» хаһыакка аахпытым. «Дом для пульта», «Потеряшка», «Рампли» диэн бырайыактары бэлэмнээтим. Бары даҕаны дьыбааҥҥа олорон, тэлэбиисэртэн арахпатах түгэннэрдээхпит буолуо дии? Оннук түгэҥҥэ пульту көрдүүрү ардыгар киһи сүрэҕэлдьиир ээ. Сорохтор ол «өйдөөх» тэрили букатын да сүтэрэр үгэстээхтэр. Дьэ, ону сүппэтин, биитэр түргэнник көһүннүн диэн, дьыбаан кэтэҕэр эбэтэр атын да сиргэ сыстаҥнас лиэнтэ көмөтүнэн иилэн кэбиһэр хаа наада.
Иккис айбыт тээбириним—ону-маны сүтэрдэххэ, дыыгынаан кэбиһэн, сүтүккүн бэрт түргэнник булларар «жучок». Мин, холобур, ачыкыбын ханна уурбуппун умнан кэбиһээччибин. Оннук сүтэрэр, умнар түгэҥҥэ, арай, «Потеряшка»-ны көмөлөһүннэриэххэ син дии? «Потеряшка»-ҕа күлүүс тылы иҥэрэн кэбиһэҕин. Итиэннэ күлүүскэ, ачыкыга, иитэр тэрилгэ иилэҕин. Ол күлүүс тылын көмөтүнэн сүтүккүн дөбөҥнүк булаҕын. Оттон «Рампли» диэн спиннер курдук киһини аралдьытар, уоскутар оонньууру толкуйдаатым.
Сашаҕа, атын да ситиһиилээхтик кыттыбыт оҕолорго Технопаарка дириэктэрэ Анатолий Аскалонович Семенов «Азбука» маҕаһыынтан сертификат туттарда. Бу куонкуруска биһиги хаһыаппыт геройа, «Сириус» кииҥҥэ тиийэн ситиһиилээхтик дьарыктаммыт, Өлүөхүмэ улууһун Кыыллаах орто оскуолатын үөрэнээччитэ Аркадий Яковлев «Электронный сонар-браслет для незрячих людей» үлэтэ эмиэ бэлиэтэннэ.
Үөрэх дьыла саҕаланна. Ол эрээри, манна сылы супту үлэ тигинэччи барар, саҥаттан саҥа айылла, оҥоһулла турар сырдык кыһата. Ол барыта үрдүк билииттэн, сатабылтан саҕыллар.
Куонкуруска кыттыҥ, саҥаны тобулуҥ
Биһиги ааҕааччыларбытыгар «Ай, тобул» диэн ааттаах саҥа куонкуруһу биллэрэбит. Өскөтүн эһиги уратыны, дьиктини айаргытын-тутаргытын сөбүлүүр буоллаххытына, бырайыаккытын 4sakral@mail.ru почтаҕа сиһилии суруйан, ойуулаан, биитэр, хаартыскаҕа түһэрэн ыытыҥ. Бырайыаккытын кытары «Кэскил», «Юность Севера» хаһыаттарга суруйтарбыт квитанцияҕытын уган ыытаҕыт. Кыайыылаахтарга бирииһи «Якутия» Технопаарка аныыр. Баҕар, эһиги инникитин Технопаарка резиденнэрэ буолуоххут, оҕолоор, кытаатыҥ!
Жанна Леонтьева.
Василий Пак түһэриилэрэ.