Олунньу 14 күнүгэр Н.Д. Неустроев аатынан Уус Таатта орто оскуолатын маҥнайгы кылаас үөрэнээччилэригэр «Баһыыба, Букубаар!» диэн бастакы ааҕарга, суруйарга үөрэппит кинигэлэрин бүтэрбит үөрүүлээх бырааһынньыга буолан ааста.
Бу күн оҕолор үөрэппит буукубаларын туһунан хоһоон, ырыа ааҕан иһитиннэрдилэр. Алта ый иһигэр туохха үөрэммиттэрин көрдөрөн араас сорудахтары толордулар уонна букубаары бүтэрдилэр диэн туоһу суруктары туттулар. Төрөппүттэр оҕолор уруһуйдарын, ыраастык устуу үлэлэрин быыстапкатын сэҥээрэн көрдүлэр. Оскуолабыт педагог-библиотекаря Розабелла Ананьевна кэлэн, бастакы сахалыы букубаар туһунан оҕолорго кэпсээтэ, кинигэлэри көрдөрдө уонна бибилэтиэкэҕэ кэлэн кинигэ ааҕалларыгар, уларсалларыгар ыҥырда. Төрөппүттэр оҕолорун букубаар тастаах минньигэс туордунан күндүлээн, бырааһынньыгы өссө киэргэттилэр уонна маҥнайгы учууталларыгар Феодосия Романовна Петроваҕа доргуччу букубаары кэпсиир, хоһооннорун доргуччу ааҕа үөрэммит оҕолоруттан үөрэн, махтал тылларын анаатылар.
Маҥнайгы кылаастарга биир умнуллубат түгэн олус үчүгэйдик ааста.
Н.Д. Неустроев аатынан Уус Таатта орто оскуолатын медиа бөлөҕө.
Таатта улууһа.
keskil14.ru