Нарыйалаах ынах ииттэллэр, өссө сымыыттыыр кууруссалардаахтар. “Уучча быраас” диир биэлсэрдэрэ Нарыйа дьонугар кэлэн, кэмиттэн кэмигэр куурусса ылан барааччы. Кыысчаан кини кууруссаны тоҕо ыларын олус интэриэһиргиир. “Уучча быраас кууруссаны сиир үһү” диэни истэн, туохтааҕар да улаханнык соһуйда. Кини дьон ынах уонна сылгы, сороҕор тайах, таба этин, куобаҕы, курупааскыны сииллэрин билэрэ.
Арай биирдэ Уучча быраас кэлбитигэр, олбуор иһигэр айдаан бөҕө. “Хайа, туох буоллаҕай?” диэн дьиэтиттэн ойон тахсыбыта, ийэтэ уонна Уучча быраас күрүө иһигэр мөхсө сылдьаллар эбит. Иннэ-манна тиийэн кэтиллэ-кэтиллэ мээнэнэн сүүрэкэлии сылдьар төбөтө суох кууруссаны тута сатаан, булумахтаныы кытаанаҕа.
Онуоха Нарыйа: “Бэйи эрэ, ити төбөтө быстыбыт куурусса тугунан көрөн сүүрэкэлиирэ буолуой?” – диэн толкуйдуу түһэр уонна ону билиэн баҕарар санаата күүһүрэр.
Ити күнтэн ыла Уучча бырааһы ыраахтан кэтээн көрөр буолла. Уонна кууруссаларын киниттэн хайдах быһыылаахтык быыһыыр толкуйга түстэ. Ээ, кырдьык даҕаны, арай маннык гыннахха?
Биир сарсыарда эрдэ далга киирэн, кырдьаҕас куурусса баттыы сытар уонча сымыытын былдьаан ылан, кэбиһиилээх от быыһыгар кистээн кэбистэ. Ол курдук хас да күн ааста. Кистээбит сымыыттарын туһунан, оонньуурун омунугар буолан, отой да умнан кэбистэ. Кууруссалар хооҕурҕаһалларын истэн, кимиэхэ да этэ илик кистэлэҥин өйдүү биэрдэ, сымыыттарын кистээбит сиригэр сүүрдэ. Дал сиэрдийэтин аннынан киирэн, кэбиһиилээх от тэллэҕин үргэҥнэтэн көрбүтэ, арай кистээн муҥнаммыт сымыыттара мэлигирдэр, ханна да суохтар. Ол оннугар от тулатынан “чууп-чаап” саҥа-иҥэ бөҕө. Кып-кыра чоппуускалар хаамыталаан чубугураһа сылдьаллар! Кыыс били кистээбит сымыыттарыттан чоппуускалар бытыгыраһан тахсыбыттарын өйдөөтө. Хааман чуочараҥнаһа сылдьааччыларга: “Улааттаххытына эһигини Уучча бырааска биэрэллэр, кини эһигини сиэн кэбиһиэ…” – диэн ботугураабытын кулгааҕа эрэ истэн хаалла.
Чоппуускалара онно эрэ наадыйбаттар, күөх окко сүүрэкэлэһэн чыбыгыраһаллар. Барахсаттары даа, киһи эрэ астына көрүөх курдуктар.
Раиса Чирикова.
Дьааҥы.