Ыам ыйын 13 күнүгэр алын кылаас учуутала, оскуолатааҕы “Көмүс бөрүө” медиа–киин салайааччыта Тарасова Людмила Сергеевна 1-4 кылаас оҕолоругар “Кэскил” оҕо хаһыатын туһунан кэпсээн билиһиннэрдэ. Хаһыат аан бастаан “Бэлэм буол” диэн ааттанан 1936 сыллаахха күн сирин көрбүт. Бу ыам ыйын 15 күнүгэр “Бэлэм буол – Кэскил” хаһыат 90 сыллаах үбүлүөйэ буоларын эттэ. Бу кылаас чааһыгар оҕолор “Кэскил” хаһыат историятын, кылаабынай редакторынан үлэлээбит дьону, хаһыат балаһаларын биллилэр. Саамай интэриэһинэйэ “Бэлэм буол” бастакы хаһыата латынныы тылынан тахсыбытын сөҕөн, ааҕан көрдүлэр. Аны хаһыаттар сылынан тас көрүҥнэрэ, ойуулара уларыйан испит эбит, ону барытын Людмила Сергеевна мунньан уура сылдьар.
Бары хамаандаҕа арахсан, хаһыат аатын араастаан кырааскалаатылар, 90 сыыппараны аппликациянан киэргэттилэр. Кыттыбыттар бары туоһу сурук, минньигэс туттулар. Оҕолор олус сэргээн кытыннылар. Эдэр кэрэспэдьиэннэр Петрова Инга, Андреева Айаана, Платонов Альберт, Борисова Сандаара, Алексеева Июлия кылаас чаас ыытыытыгар, оҕолорго күүс- көмө буоллулар.
Күндү “Кэскил” хаһыаппытын, редакция үлэһиттэрин хаһыат 90 сылынан эҕэрдэлиибит, өссө да куруук бэчээттэнэ турарыгар, элбэх ааҕааччыны!
Никифорова Саяна, 9 кылаас, Илбэҥэ, Бүлүү