Мүрү Г.В. Егоров аатынан 1 №-дээх орто оскуолатын иһинэн үлэлиир “Мүрү” байыаннай-патриотическай кулууп туһунан кэпсиим.
Кулуубу 2007 сылтан СӨ үтүөлээх, СӨ кадетскай үөрэхтээһинин үтүөлээх учуутала, «Патриот России» мэтээл кавалера, “За профессионализм и решительность” бочуотунай бэлиэ хаһаайына, ОБЖ предметин үрдүк категориялаах учуутала Николай Семенович Андросов салайар.
Николай Семенович уолаттары аармыйаҕа баран сулууспалыылларыгар эрдэттэн бэлэмниир, хорсун-хоодуот буоларга иитэр, үөрэтэр. Кулууп иитиллээччилэрэ уоллуун-кыыстыын күүстээх санаалаах, тулуурдаах, кыайыыга дьулуурдаах буолалларыгар Николай Семенович үгүс сыратын, сатабылын уурар, Ийэ дойдуларын көмүскүүр үтүө дьон буолан тахсалларыгар иитэр.
Уон сыл иһигэр “Мүрү” БПК улуус, өрөспүүбүлүкэ чиэһин Россия таһымнаах күрэхтэһиилэргэ тиийэ үрдүк ситиһиилээхтик көмүскүүр. Быйылгы үөрэх дьыла саҕаланыытыгар Хаҥалас улууһун Өктөмүгэр үөрэнээччилэр уонна ыччат IV сүлүөттэригэр I миэстэни ылбыттара. “Хаардаах барс” өрөспүүбүлүкэтээҕи байыаннай-спортивнай оонньууга икки төгүллээх чемпион (2009 с. Нерюнгри к., 2011 с. Амма с.), хаста да призер буолбуттара. Биирдиилээн күрэхтэргэ: аптамааты ыһыыга, хомуйууга, ОЗК кэтиитигэр, ытыыга кулууп иитиллээччилэрэ ситиһиилээхтик кытталлар.
Биһиги оскуолабыт “Мүрү” байыаннай патриотическай кулуубунан киэн туттар. Өссө элбэх кыайыыны, ситиһиини баҕарабыт.
Нарыйа КОЛМАКОВА,
III “Б” кылаас,
“Сыдьаай” пост.
Мүрү, Уус Алдан.