Ой орто оскуолатын үөрэнээччилэрэ уонна учууталлара хас да сыл устата, үөрэх сылын саҕаланыыта, тыа хаһаайыстыбатын институтугар хортуоска хостооһунугар күүскэ үлэлииллэр. Бу төрүт үгэскэ кубулуйбут үтүө үгэс биһиги оскуолабыт олоҕор ураты суолталаах.
Уопсайынан 20 гектар иэннээх сиргэ Вармас, Якутянка уонна Тулунский ранний диэн үс араас көрүҥ хортуоска үүнэр. Бу курдук киэҥ сиргэ Ой орто оскуолатын үөрэнээччилэрин таһынан, И. М. Яковлев аатынан Покровскай куорат 1 №-дээх оскуолата уонна «Айтыын» колледж устудьуоннара эмиэ кэлэн үлэлииллэр. Манна үлэ-хамнас күүскэ барар, дьон-сэргэ түмсэн биир кэлим буолан үлэлиир.
Үлэ төлөбүрдээх: быйыл биир куул хортуоска сыаната 50 солкуобай. Үөрэнээччилэр төһө куулу хомуйбуттарынан хамнас ылаллар. 5-11 кылаас үөрэнээччилэрэ сылдьаллар. Улахан оҕолор соҕотохтуу, онтон кыра кылаастар 2-3 буолан үлэлииллэр уонна хамнастарын үллэстэллэр. Бу кинилэр бастакы үлэлиир уопуттара, харчы суолтатын өйдүүргэ уонна күүс-күдэх сыанатын билэргэ үөрэтэр.
Үлэ сарсыарда 9 чаастан саҕаланар. Күүстээх үлэ кэннэ саамай минньигэс астаах оскуолабыт повардара миининэн уонна соккуойунан күндүлүүллэр. Тото-хана аһаан баран, оҕолор сирдэрин бүтүөр диэри үлэлииллэр. Күн аайы 30-40 боронууну конопатканан арыйаллар. Комбайн оннугар илиинэн хомуйар ордук диэн институт үлэһиттэрэ бэлиэтииллэр, тоҕо диэтэххэ хортуоска буортуйбат, кэмигэр хомуллар.
Туһата бүтүн Сахабыт Сиригэр
Бу хомуйуллубут хортуоска бүтүн Сахабыт Сирин араас улуустарыгар тарҕатыллар. Сиэмэни оҥорон элбэх улууска туһаны аҕалар, кэлэр үүнүүгэ тирэх буолар. Ити курдук, биһиги оҕолорбут үлэлэрэ республика тыа хаһаайыстыбатын сайдыытыгар бэйэлэрин кылааттарын киллэрэллэр.
Оскуола оҕолорун күүстээх кыттыыта
Биһиги оскуолабыт үөрэнээччилэрэ бу хортуоска хомуйуутугар эрэ буолбакка, сайынын эмиэ үлэҕэ уопуту мунньаллар. Саҥа көрүҥнэри айарга уонна ону хомуйарга көмөлөһөллөр. Ону таһынан, кууллаах хортуосканы таһарга 9-с кылаастан үөһээ уолаттар үлэлииллэр. Биһиги оскуолабытыттан үксүн мас тардыһыытынан дьарыктанар улахан кылаас уолаттара күүскэ үлэлииллэр, бу элбэх күүһү эрэйэр үлэҕэ олус туһалыыллар.
Наҕараада уонна үөрэх
Сылын аайы саамай элбэх куулу хомуйбут үөрэнээччилэргэ Үүнүү Дьоро Күнүгэр анаммыт анал бириистэр туттарыллаллар. Ону таһынан, сылын аайы Бүтэһик чуораан үөрүүтүгэр тыа хаһаайыстыбатын институтун аатыттан выпускниктарга бириэмийэ уонна Махтал сурук туттараллар.
Онон бу хортуоскаҕа үлэлиир үөрэнээччилэргэ элбэх туһаны аҕалар. Үөрэнээччилэр хамнас эрэ үтүөтүн көрбөккө, тулуурдаах буоларга, бэйэ бэйэлэригэр көмөлөһүүгэ, тыа хаһаайыстыбатын үлэтин сыаналыырга, дьиэ кэргэннэригэр хортуоска үүнүүтүн сыаналыырга, дьиҥнээх үлэһит киһи буоларга үөрэнэллэр. Улэһит үөрэнээччилэрбитигэр куруук маннык биир дьиэ кэргэн курдук түмсэн үлэлииргэ, сомоҕолоһууну күүһүрдэргэ баҕарабыт!
«Этин» медиа киин, Ой орто оскуолата, Хаҥалас