Соторутааҕыта биһиги ийэбит Амма улууһун Эмис нэһилиэгин олохтооҕо Туйаара Петровна Устинова Араассыыйа Президенэ Владимир Владимирович Путин ыйааҕынан «Герой-Ийэ» үрдүк аатын ылбыта.
Мин уон оҕолоох Устиновтар дьиэ кэргэттэригэр саамай кыралара буолабын. Аан бастаан биһиэхэ Саха Өрөспүүбүлүкэтин Ил Дархана Айсен Сергеевич Николаев ыалдьыттыы кэлэр диэни истэн баран олох итэҕэйбэтэҕим. Ол гынан баран испэр наһаа үөрбүтүм уонна бу барыта кырдьык буолуон баҕарбытым.
Кэтэһиилээх күммүт алтынньы 19 күнэ үүнэрэ чугаһаатар чугаһаан испитэ. Ил Дархан Айсен Сергеевич Николаев кэлэригэр дьиэ кэргэн бары бэлэмнэнии бөҕөтө буолбуппут. Эбэм Герой-ийэ Татьяна Никифоровна Новикова, биһиги аттыбытыгар куруук баар, күүс-көмө буолар эбэбит Софья Александровна Устинова, эдьиийбит Феодосия Александровна Устинова уонна ийэм Туйаара Петровна ордук улаханнык долгуйбуттара, үөрбүттэрэ. Кинилэр үөрбүттэрин көрөммүт биһиги эмиэ тэбис-тэҥҥэ үөрдүбүт-көттүбүт.
Алтынньы 19 күнүгэр Ил Дархан ийэбитин, эбэлэрбитин Саха Өрөспүүбүлүкэтигэр Ийэ күнүнэн эҕэрдэлии тапталлаах Эмиспитигэр вертолетунан көтөн кэллэ.
Оскуола, детсад оҕолоро, нэһилиэк тэрилтэтин бары үлэһиттэрэ, салайааччылара, эбэлэрбит, эдьиийдэрбит, ийэбит дьүөгэлэрэ – бары-бары нэһилиэкпит ытык ыала Прасковья Николаевна уонна Павел Прокопьевич Николаевтар ааттарынан Ил Эйэ муостатыгар түмсэн өрөспүүбүлүкэбит Ил Дарханын уруйдуу-айхаллыы көрүстүлэр.
Бу күн биһиги тэлэгэһэбит, биһиги дьиэбит үөрүүнэн туолла. Аҕабыт Сергей Анатольевич Устинов баара эбитэ буоллар төһө эрэ үөрүө этэ… Кини биһигини үөһэттэн көрөн тэҥҥэ үөрбүтэ буолуо дии саныыбын.
Айсен Сергеевич мин дьиэ кэргэмминээн күн аайы төгүрүччү олорон аһыыр улахан остуолбутугар тэҥҥэ олорон чэйдээтэ. Олус элэккэй, норуот киһитэ диэн көрдүм. Биһиэхэ, оҕолорго корзина муҥунан фрукта уонна минньигэс кэһии аҕалбыт.
Ийэбэр сибэкки дьөрбөтүн кытта бэлэх, эбэлэрбэр эмиэ сибэкки дьөрбөтүн туттарда уонна кинилэргэ махтанна.
Ийэм ийэтэ, биһиги эбэбит Татьяна Никифоровна Новикова, ийэм эбэтэ, биһиги хос эбэбит Елена Петровна Новикова уонна ийэбит Туйаара Петровна Устинова үһүөн Герой-Ийэлэр.
Үс көлүөнэ Герой-Ийэлэр диэн сүрдээх улахан суолталаах буолалларын бүгүн биһиги, оҕолор киэн тутта көрдүбүт. Нэһилиэкпит баһылыга Прокопий Петрович Бубякин: «Арассыыйа Герой-Ийэлээх буоламмыт нэһилиэкпитигэр өрөспүүбүлүкэбит Ил Дархана Айсен Сергеевич Николаев анаан-минээн ыалдьыттаан ааста. Бүгүн чахчы историческай суолталаах күн буолла», – диэн эппитин киэн тутта иһиттим.
Аһыыр остуолбут тула олорон Ил Дарханы кытта кэпсэтэллэригэр ийэм Эмис нэһилиэгэр саҥа оскуола-сад тутуутун туруоруста. Айсен Сергеевич ийэм туруорсуутун болҕомтоҕо ылыа, биһиги хайаан да саҥа оскуолаҕа үөрэниэхпит диэн эрэнэбин.
Тыа сиригэр олорор ыал буоламмыт 20-чэ сүөһүлээхпит, ол иһигэр ыанар ынахпыт – 9. Бары тугу сатыырбытынан көмөлөһөбүт. Холобур, мин ньирэй аһатабын, сымыыт хомуйабын, эдьиийдэрим, убайдарым оҕолорун көрсөбүн, иһит сууйабын. Ийэм өрөспүүбүлүкэ салалтата тыа хаһаайыстабын өйүүрүгэр махталын биллэрдэ уонна ынах төбөтүгэр көрүллэр өйөбүл кэмигэр оҥоһуллуон баҕарарын туһунан эттэ.
– Олоххо биирдэ бэриллэр умнуллубат, дьоллоох күнү бииргэ үөрэн-көтөн атаарбыт нэһилиэкпит олохтоохторугар махтанабын, – диэн этэр ийэм Туйаара Петровна.
Ийэбин Арассыыйаҕа «Герой-Ийэ» уордьанын тута Москва куоракка ыҥыралларын бары долгуйа күүтэбит.
Таня УСТИНОВА, VI кылаас,
В.М. Новиков-Күннүк Уурастыырап аатынан Эмис орто оскуолата, Амма