Ороһу нэһилиэгэр учууталынан үлэлээбит филологическай наука кандидата, СССР суруналыыстарын сойууһун чилиэнэ, литературнай кириитик, учуонай-литературовед, методист-учуутал Георгий Романович Кардашевскай бүгүн, ыам ыйын 5 күнүгэр, 110 сылын туолар. Бу бэлиэ күнү көрсө Ороһутааҕы оскуола-саадыгар ыытыллыбыт тэрээһиннэри билиһиннэрэбит.
Саамай кырачаан оҕолор суруйааччы айымньыларын кытта билистилэр.Ол курдук, И.Е. Иванов-Уйбаан Ороһуунускай аатынан модельнай библиотекаҕа (сэбиэдиссэй Иванова Ж.С.) «Иэйиэхсит» оҕо бөлөҕө (салайааччы Михайлова Н.Н.) уонна уһуйаан иитиллээччилэрэ (иитээччилэр Дордосова С.Т., Данилова В.В.) Г.Р. Кардашевскай оҕолорго аналлаах айымньыларынан тэрээһин ыыттылар.
Бэһис кылаас үөрэнээччитэ Витя Котоконов олоҕун, үлэтин туһунан билиһиннэрэн оҕолор болҕомтолорун тарта. Уһуйаан оҕолоро «Ойуур кыыллара», иккис кылаас үөрэнээччитэ Наиля Осипова «Хоһуолчаан», төрдүс кылаас үөрэнээччитэ Леня Дордосов «Тулаайах бэс» хоһооннорун, 5 кылаас үөрэнээччитэ Айсаана Павлова Л.Н. Толстой «Хахай уонна ыт» сахалыы тылбааһын кэпсээн оҕолор сэҥээриилэрин ыллылар. Онус кылаас үөрэнээччилэрэ, бэһис кылаастан Г.Р. Кардашевскай аатын сүгэллэр (кылаас салайааччыта Габышева Г.Ю.). Кылаас аан бастаан суруйааччы олоҕун кыргыттара таҥан таһаарбыт «Дьиэ кинигэтэ» диэн кинигэни ааҕан билбиттэр. Өссө дириҥэтэр сыалтан оҕолор кыыһын Галина Георгиевнаны уонна сиэннэрин кытта көрсүспүттэр. Кыыһын, сиэннэрин кытта суруйааччы төрөөбүт алааһынан сылдьыбыттар. Ону таһынан олоҕор, айымньытыгар «Борогуйга» диэн кинигэтигэр олоҕуран Д.Е. Иванов-Артыыс Миитэрэй аатынан норуот тыйаатырын өрөсүссүөрүн Сайыына Константиновна Васильеваны кытта киинэ устаннар көрөөччүлэртэн биһирэммиттэр.
Бүгүн кылаастарыгар 110 сылын көрсө кылаас чааһа ыытылынна. Оҕолор 5-10 кылааска дылы суруйааччыга аналлаах тэрээһиннэр, бырайыактар тустарынан санаан, санаа атастаһыыта буолла. Кирилл Петров Г.Р. Кардашевскай олоҕун, айымньыларын туһунан кэрэхсэбиллээхтик кэпсээн, оҕолорго интириэһи сахта. Кэлэр нэдиэлэҕэ оскуола иһинэн үбүлүөйдээх тэрээһиннэр саҕаланыахтара. Холобур, орто сүһүөх кылаастарга Галина Юрьевна Габышева Георгий Романович Кардашевскай олоҕор сыһыаннаах квест-оонньуу ыытарга былаанныыр. Бу тэрээһин туһунан суруйуохпут. Ыытыллыбыт, ыытыллыахтаах тэрээһиннэр үбүлүөйдээх суруйааччы аатын үйэтитэр эрэ буолбакка, кэлэр көлүөнэ ыччаты төрөөбүт тылга уонна төрөөбүт дойдуларыгар тапталы иҥэрэргэ улахан суолталаах.
Алина Габышева, «Тымтык» эдэр кэрэспэдьиэннэрин поһа, Үөһээ Бүлүү Ороһу.
Кэскил14.ру