Олунньу 4 күнүгэр биһиги Хадаарбытыгар буолан ааспыт оскуолабыт бочуоттаах мецената, «Республикатааҕы инвестиционнай компания (РИК)» бастакы генеральнай дириэктэрэ, Россия бочуоттаах тутааччыта, Саха Өрөспүүбүлүкэтин норуотун хаһаайыстыбатын үтүөлээх үлэһитэ, Чурапчы улууһун, Чурапчы, Одьулуун, Хадаар нэһилиэктэрин бочуоттаах гражданина Александр Иванович Федотов аатынан V өрөспүүбүлүкэтээҕи куонкурус кыттыылаахтарын, Дириҥ агрооскуола үөрэнээччилэрин, көрсөн кэпсэттим.
Ярослава Хоютанова Дириҥ агро оскуолатыгар Х кылааска үөрэнэр. Бу куонкуруска кыттан улахан уопут ылбыт. Кини математиканы сөбүлүүр. Садаача, ахсаан суотугар улахан интэриэстээх. Инникитин архитектура хайысхатынан идэни баһылыан баҕарар.
Талан ылар хайысхаҕар ситиһиилэри баҕарабын, Ярослава!
***
Владислав Пестерев Дириҥ агрооскуолатын IX кылааһыгар үөрэнэр. Үөрэххэ да, спорка кыһаллар.
– “Федотовскай ааҕыылар” олус интэриэһинэй куонкурус. Олимпиада, хоһоон, бырайыактары көмүскээһин – барыта баар. Бэйэм математиканы ордоробун. Инникитин математика учууталынан үлэлэлиэхпин баҕарабын, – диэн кэпсиир кини.
Үөрэнэн, идэ ылан математика учууталларын кэккэтин хаҥатаргар ис сүрэхпиттэн баҕарабын.
***
Эрсан Петров Дириҥ агрооскуолатыгар IX кылааскак үөрэнэр. “Федотовскай ааҕыылар” туһунан олус үчүгэй өйдөбүллээх. Эрсан математиканы, физиканы сөбүлүүр. Улааттаҕына, физика, математика учууталынан үлэлиэн баҕарар.
Эрсан, эн физика, математика учуутала буоларгар баҕарабын.
***
Альмира Макарова Чурапчытааҕы агротехническай колледжка үөрэнэр. Кини кыһаллан үөрэнэр, спордунан эмиэ кыһаллан дьарыктанар.
– Бу куонкуруһу үчүгэйдик тэрийбиттэр. Хадаар оскуолатыгар махтанабын. Бэйэм математиканы сөбүлүүбүн. Кыра эрдэхпиттэн ахсааны суоттуубун. Экономическай үөрэххэ киириэхпин баҕарабын, – диэн санаатын үллэһиннэ.
Альмира, экономическай хайысхаҕа бастыҥ идэлээх, дойдугар туһалаах киһи буол!
Байдам ЕФИМОВ, V кылаас,
С.Д. Флегонтов аатынан Хадаар орто оскуолата, Чурапчы