Мэҥэ Хаҥалас улууһун Аллараа Бэстээх уонна Павловскай икки ардыгар ЯТЭК хампаанньа салайыытынан метанол собуотун тутарга суоттанарын туһунан элбэхтик араадьыйаҕа ахтан аастылар, хаһыакка суруйдулар уонна күөх экраҥҥа көрдөрдүлэр. Бу метанол собуота дьоҥҥо-сэргэҕэ, айылҕаҕа аҕалар буортутун туһунан хас хардыы аайы кэпсииллэрин истэбит. Биллэн турар, манна оҕолор эмиэ туора турбаттар. Кэнэҕэһин кинилэр бу дойдуга олохсуйуохтара, оҕо-уруу төрөтөн тэнийиэхтэрэ турдаҕа. Оҕолор эмиэ дойдуларын таптыыр, кыһаллар буолан, собуот тутуутун утаралларын биллэрдилэр.
Мин Павловскай орто оскуолатын үөрэнээччитэ метанол собуотун туталларын күүскэ утарабын! Билэргит курдук, ыраас уу аан дойду үрдүнэн аҕыйаан турар. Улуу Китай курдук дойдуларга уу да тиийбэт кыһалҕата турда. Онтон соҕуруу дойдуларга өрүстэрин ууларын иһиллибэт гына кирдээх. Ол аата сотору ыраас уу тиийбэт куттала турар. Бу Сахабыт сиригэр баар уулар үгүстэрэ ыраастар уонна эмтээхтэр. Онтон Өлүөнэ эбэ киттийдэҕинэ Саха сиригэр үгүс улуустарга иһэр уубут суох буолар кутталланар. Олохтоох нэһилиэнньэ бу заводу утарабыт. Тоҕо диэтэргин, биһиги дойдубутун харыстыыбыт, ону тэҥэ маннык собуот саахала элбэхтэ буолбута. Холобура, Индияҕа 10000 тыһыынча киһини өлөрбутэ. 2015 сылга Китайга эмиэ авария буолан турардаах.
Түмүкпэр этиэм этэ, Өлүөнэ эбэ ыраас хааллаҕына, Россияҕа ыраас уу ахсаана элбиир, Россия инникитин ыраас уулаах дойдунан хаалар.
Огонеров Дьулуур,
Павловскай орто оскуолатын IX а кылаас үөрэнээччитэ
Биһиги нэһилиэкпитигэр метанол собуот тутаары былаанныы сылдьаллар. Павловскай олохтоохторо ол собуоту тутталларын утарабыт. Нэһилиэкпитигэр улахан мунньах, Майа сэлиэнньэтигэр миитин буолан ааста. Бу собуот тутуутуттан саҕалаан айылҕаҕа элбэх хорумньуну оҥорор. Айылҕабыт барахсан киртийэр. Тыа сирин дьоно сүөһүнү, сылгыны иитэбит, оҕоруот аһын үүннэрэбит. Онно олус охсуулаах буолуо.
Габышева Вика,
Павловскай орто оскуолатын IX б кылаас үөрэнээччитэ
Бу собуоту тутарга хаарыан баай тыабытын кэрдиэхтэрэ. Саамай улахан Өлүөнэ өрүспүтүгэр дьааттаах тобохторун тоҕуохтара. Собуот ыраас салгыммытын киртитэн, киһи доруобуйатыгар улахан охсууну оҥоруо. Дьон-сэргэ, кыыл-сүөл, көтөр-сүүрэр барыта эмсэҕэлиэ диэн олус куттанабын.
Яковлева Феня
Павловскай орто оскуолатын V а кылаас үөрэнээччитэ.
Кэпсэттэ Колесова Айыына, IX б кылаас, юнкор пост Павловской СОШ «Билим»