Сарсын бары оскуолаларга тиһэх чуораан чугдаарыа. Түгэнинэн туһанан, быйыл Сунтаардааҕы политехническай лиссиэй-интэринээти бүтэрээри сылдьар биир саастыылаахтарбыттан инникитин ханнык идэни баһылыыр баҕалаахтарын уонна оскуола кэминээҕи умнуллубат түгэннэриттэн санааларын үллэстэллэригэр көрдөстүм.
Ира Слипченко, 11-с «А» кылаас:
– Мин аатым – Ира. Экономист идэтигэр туттарсар баҕа санаалаахпын. Эбэм идэтин олус күүскэ сөбүлүүрүн көрөммүн, киниттэн холобур ылбытым. Кини миэхэ олохпор сирдиир сулуһум буолар. Инникитин кини курдук үлэһит киһи буолуохпун баҕарабын.
Оскуолатааҕы олохпуттан саамай умнуллубат түгэнинэн билигин үөрэтэ сылдьар вальспыт буолар. Доҕотторбун кытары бииргэ үҥкүүлүүрбүн олус долгуйа күүтэбин. Бу вальс миэхэ оскуолабын өрүү күндүтүк санатыаҕа.
Саина Иванова, 11-с «В» кылаас:
– Мин инникитин архитектор буолуохпун баҕарабын. Ити санаам 9-с кылааска үөрэнэ сырыттахпына үөскээбитэ.
Оскуола саамай дьоллоох кэмнэринэн 11-с кылааска доҕотторбун кытта бииргэ атаарбыт түгэннэрим буолаллар, кинилэри хаһан даҕаны умнуом суоҕа.
Кристина Тимофеева, 11-с «А» кылаас:
– Быйыл 11-с кылааһы бүтэрэн, инникитин SMM-менеджмент идэтигэр үөрэниэхпин баҕарабын. Социальнай ситимнэри сайыннарар, саҥа контены оҥорор уонна дьону кытта алтыһар миэхэ олус интэриэһинэй.
Оскуолатааҕы сылларбыттан саамай умнуллубат түгэнинэн кылааһым оҕолорун, доҕотторбун кытта оскуола олоҕун туһунан көрдөөх видеолары устубуппут буолар. Ону таһынан бүтэһик чуорааҥҥа бэлэмнэнэр кэммит биһигини өссө ордук чугаһатта. Бу истиҥ түгэннэр миэхэ өрүү күндү, умнуллубат кэм буолуохтара.
Ира АФАНАСЬЕВА, СПТЛ-И 11-с кылаас, Сунтаар