Балаҕан ыйын 1 күнэ — Билии күнэ! Бу күн маҥнайгы кылааска кырачаан оҕолор алтан чуораан тыаһынан оскуола боруогун аан маҥнай атыыллаан киирдилэр. Онтон үрдүкү кылаас үөрэнээччилэрэ инники олохторугар эрэллээх дабайыыны оҥорор күүрүүлээх күннэрэ. Лөгөй лиссиэй-интэринээтигэр бу бырааһынньык өрүү ураты суолталаах.
Манна улуус, өрөспүүбүлүкэ араас муннугуттан мустан, билиигэ-көрүүгэ баҕалаах, олимпиадаларга уонна научнай конференцияларга кыайыыга дьулуурдаах, активист, спортсмен, инникигэ кэскиллээх оҕолор үөрэнэллэр.
Бу сылга Билии күнүн үтүө сарсыардата Кэптэни сиригэр күһүҥҥү сайаҕас салгынынан, учууталлар уонна үөрэнээччилэр истиҥ мичээрдэринэн саҕаланна. Үөрүүлээх линейка өрөгөй ырыаларын толоруунан арылынна.
Лицей оҕолоругар, төрөппүттэригэр уонна педколлективка анаан үрдүк таһымнаах эҕэрдэ тылларын лицей дириэктэрэ М.С. Пахомов, Лөгөй нэһилиэгин баһылыга Н.Н. Попов уонна Уус Алдан улууһун үөрэҕин салалтатын начальнигын солбуйааччы М.П. Пухов тиэртилэр. Кинилэр бэлиэтээбиттэринэн, Лөгөй лицейэ сылтан сыл көрдөрүүтүн тупсаран, улуус эрэ буолбакка, өрөспүүбүлүкэ таһымыгар кынаттаах ыччаттары иитэн таһаарар бастыҥ кыһа буолар. Быйыл физика уонна музыка кабинеттарыгар оҕолор үөрэнэллэригэр анаан саҥа тэриллэр, эбии 3 кабинекка смарт-телевизор кэлбиттэрин үөрэ иһиттибит.
Бу үөрүүлээх күн 50 сыл аннараа өттүгэр оскуола боруогар үктэммит үөрэнээччилэр, о.э. 1986 сыллаах Лөгөй оскуолатын выпускниктара, маҥнайгы кылаас оҕолоругар, үтүөнү баҕаран туран сэмэй бэлэхтэрин туттардылар. Маны тэҥэ 25 сыл анараа өттүгэр оскуоланы бүтэрбит 2001 сыллаах Лөгөй орто оскуолатын уонна Саха-Бельгийскэй гимназия выпускниктара оскуола кэмнэрин олус сылаастык санаан тураннар, лицейга бэйэлэрин бэлэхтэрин ууннулар. Уонна быйылгы выпускниктарбыт, үгэһи тутуһан, кырачаан бырааттарыгар, балтыларыгар эҕэрдэ тыллаах сэмэй бэлэх туттардылар.
Быйыл уопсайа 210 үөрэнээччи буолан үөрэхпит сылын саҕалыыбыт. Бу үөрэх дьылыгар информатика учууталынан, биһиги оскуолабыт 2021 сыллаах выпускницата Валентина Вячеславовна Алексеева учуутал идэтин саҕалаата. Кини бэйэтин үөрэммит кыһатыгар учуутал быһыытынан төннөн кэлбитэ олус кэрэхсэбиллээх. Уонна Сивцева Амелия Ньургуновна диэн педагог-психолог үлэлии кэллэ. Бу эдэр педагогтарга үлэҕэ ситиһиилэри, саҥа саҕалааһыннары олоххо хорсуннук киллэрэллэригэр баҕарабын!
Ол курдук, быйыл Лөгөй лиссиэй интэринээтигэр суолталаах уларыйыылар таҕыстылар. Салайар үлэҕэ уопутурбут, бэйэтин идэтигэр бэриниилээх исписэлиис Михаил Петрович Пухов быйыл, 2026 сылга, улуустааҕы үөрэҕирии салалтатын начаалынньыгын солбуйааччытынан үлэҕэ ыҥырылынна. Онтон саҥа дириэктэринэн Максим Семенович Пахомов ананна. Убаастыыр опыттаах учууталларбытыгар саҥа үлэҕэ өссө элбэх кыайыыны-хотууну баҕарабыт!
Ааспыт үс ыйдаах кэтэһиилээх сайыҥҥы сынньалаҥ кэмигэр биһиги лиссиэйбит үлэтэ күөстүү оргуйбута: кыра кылаастарга «Цифра +» диэн күнүскү лааҕыр Валентина Гаврильевна Нафанаилова салайыытынан ситиһилээхтик улэлээн 1 сезону түмүктээбитэ. Ол кэннэ, 2-с сезоҥҥа «Каникулярная школа» 9 -11 кылаастарга (сал. М.Н. Хабарова) тэриллэн, уопсайа 120 оҕо лааҕырынан хааччыллыбыта.
Үөрүүлээх быһыыга-майгыга, бары мустубут дьоҥҥо-сэргэҕэ 11 кылаас «Школьный вальс» үҥкүү анаатылар, 9 кылаастар Арассыыйа бары үөрэнээччилэрин «Самолетик будущего» акция чэрчитинэн флешмобка кыттыстылар.
Уонна бүгүн саамай долгуйар уонна үөрэр дьоннорунан — лицей кэккэтигэр саҥа киирбит 9 үөрэнээччилэр буоллулар. Учууталларын Валентина Гаврильевна Нафанаиловалыын
оскуолаҕа үөрэҕи саҕалыыр маҥнайгы чуораанын 1 кылаастар чугдаара тыаһатан, саҥа 2026–2027 үөрэх сыла арыллыбытынан туоһулаата.
Лицеистар бастакы бүтүн Арассыыйатааҕы уруокка ыҥырыллыннылар. Оскуола сыллара уруоктар эрэ буолбакка, чаҕылхай түгэннэринэн, үөрүүнэн, сылаас сыһыаныны бэлэхтиир. Инникигэ — айар үлэ, сатабыл, сыралаах үөрэх уонна оскуола олоҕун умнуллубат кэрэ түгэннэрэ!
Лөгөй лиссиэй-интэринээтин үөрэнээччилэригэр, коллективыгар уонна төрөппүттэргэ саҥа үөрэх сылыгар үрдүк ситиһиилэри, саҥа арыйыылары уонна чиҥ билиини баҕарабын!
Янис СЫСОЛЯТИН, lX кылаас, Лөгөй лиссиэй-интэринээт,
«SiTiM LegMedia» юнкора, Кэптэни, Уус Алдан