Бүгүн, муус устар 14 күнүгэр биһиги «Сосновый бор» лааҕыр «Расскажи о главном» смена юнкордара СӨ национальнай бибилэтиэкэтигэр сырыттыбыт. Сарсыарда 9:30 айаннаан барбыппыт. Бибилэтиэкэҕэ киирдэххэ, киһи бэйэтин ураты эйгэҕэ — уоскулаҥ уонна үөрэх эйгэтигэр — киирбит курдук сананар. Бибилэтиэкэ иһэ уучуумпу уонна ким да мэһэйдээбэт, тыаhаабат этэ. Бу сырыыбыт биһиэхэ олус интэриэһинэй уонна умнуллубат түгэн буолла.
Биһиги манна «Кэскил» хаhыат 2005-2009 сыллааҕы подшивкаларын көрдүбүт. Олоҥхо ыһыаҕын уонна олоҥхо туһунан интэриэһинэй ыстатыйалары көрдөөтүбүт. Холобура, мин 2009 сыллаахха Кэскилгэ тахсыбыт «Олоҥхоһут оҕолор» диэн ыстатыйаны интэриэһиргээн аахтым.
Саха сирин кэрэ айылҕалаах сиригэр Сунтаар Күүкэйигэр сайын аайы олоҥхо лааҕыра аһыллар эбит. Онно «Олоҥхо дойдутун оҕолоро» фестиваль кыайыылаахтара, дьоҕурдаах оҕолор дьарыктаналлар эбит. Онно 9 улуус оҕото кэлэн үөрэммит эбит. Ол оҕолор: Петя Попов Нам, Ганя Мэҥкэрэп Бүлүү, Юра Борисов Республикатааҕы лицей, Гуля Ангаскиева Күүкэй, Таня Львова 2005 с. Олоҥхо фестивалын гран-при кыайыылааҕа, Паша Можарова Таатта — олоҥхоҕо дьоҕурдаах оҕолор эбиттэр. Кинилэри СР үтүөлээх учуутала, уһуйааччы, олоҥхоһут Никандр Прокопьевич Тимофеев, Диана Егоровна Тарабукина Төхтүр, Мэҥэ Хаҥалас, М.В. Николаева сүрүннээтилэр диэн ыстатыйаны «Кэскил» хаhыакка суруйбуттар.
Марина Попова, 7 кылаас, Кэбээйи орто оскуолата