Үтүө күнүнэн, биһиги бүгүҥҥү ыалдьыппыт байыаннай дьайыы кыттыылааҕа, Бүлүү куоратын олохтооҕо Еремей Захарович Ермолаев.
— Еремей Захарович, байыаннай дьайыыга ханнык чааска сылдьыбыккытый?
— Мин 2023 с. контрагынан Дальний Востокка Бикин диэн куоракка тиийэн 5-с армия 57 бригадатыгар тиийбитим. Миигин разведка батальонугар ылбыттара, онтон сэтинньи ыйга сэриигэ барбытым.
-Биһиэхэ эһэҥ, Аҕа дойду сэриитин кыттыылааҕын туһунан кэпсиэҥ дуо?
-Мин аҕам өттүттэн икки эһэм уонна ийэм аҕата, Аҕа Дойду Улуу сэриитигэр сылдьыбыттара. Эһэм Еремей Прокопьевич Ермолаев, аҕам аҕата уонна кини убайа Ермолаев Прокопий Прокопьевич иккиэн 1939 сыллаахха сэриигэ ыҥырыллан барбыттара. Бастаан финскэй сэриигэ сылдьыбыттара, онтон 1941 сыллаахха Аҕа дойду сэриитэ буолбутугар онно иккиэн бараллар. Эһэм Ермолаев Еремей 1942 сыллаахха Воронеж куоракка сэриилэһэ сылдьан онно охтубута. Онтон эһэм убайа Ермолаев Прокопий Прокопьевич Берлиҥҥэ диэри тиийэ сэриилэспитэ. 1945 сыллаахха ыам ыйын 8 күнүгэр Берлин штурматыгар сылдьан онно охтубута. Онон иккиэн сэрииттэн эргиллэн кэлбэтэхтэрэ.
— Кинилэр хас оҕолоох этилэрий?
— Эһэм Ермолаев Еремей Прокопьевич икки уоллаах этэ мин билэрбинэн, аҕам убайа эмиэ Ермолаев Прокопий икки уоллаах этэ.
Ийэм аҕата, эһэм Горохов Иван Иванович төрдө Бүлүү. Кини Үөһээ Бүлүүгэ учууталлыы сылдьан, сайын 1942 сыллаахха сайын саҕаланыыытыгар командировкаҕа Дьокуускай куоракка барар.
Онно сырыттаҕына 1941 сыллаахха бэс ыйын 22 чыыһылатыгар сэриини биллэрбиттэр. Кини военкоматка тиийэн сайабылыанньа суруйан сэриигэ барар. Москваны көмүскүүргэ, Курскай дугаҕа сылдьан ыараханнык бааһыран дойдутугар төннөн кэлбитэ. Салгыы эмтэнэн баран учууталынан үлэлээбитэ. Кини бииргэ төрөөбүт балта Анна Ивановна Горохова, САССР үтүөлээх учуутала этэ.
—Дьиэ кэргэҥҥитигэр эһэҕитин үйэтитэргэ туох үгэс баарый?
— Биһиги эһэлэрбитин куруук саныыбыт, ахтабыт, киэн туттабыт. Аҕа Дойду Улуу сэриитигэр сылдьан оҕолоро, сиэннэрэ үчүгэй олоххо олорорбут туһугар кинилэр сэрии хонуутугар охтубуттара. Кыайыы күнүгэр кинилэр хаартыскаларын тутан парадка хаамабыт. Оҕолорбут, сиэннэрбит кинилэр тустарынан дакылаат суруйан ааҕыыларга кытталлар. Бойобуой мэтээллэрин, докумуоннарын кичэллээхтик уура сылдьабыт.
— Буойун саллаат сиэнэ буолар олоххутугар туох оруоллааҕый?
— Биьиги кыра эрдэхпититтэн патриотизм тыыныгар иитиллибиппит. Мин эмиэ эһэлэрим курдук Ийэ дойдубун көмүскүөм диэммин 2023 сыллаахха байыаннай дьайыыга барбытым. Байыаннай дьайыыга сырыттахпына, үөрэммит Г.С. Донской аатынан оскуолабыттан 2-с кылаас оҕолоро посылка хомуйан, сурук бөҕө суруйан ыыппыттара. Мин бастаан эвакуацияҕа суоппардаабытым, онно сырыттахпына икки массыынам дэлби тэптэриигэ түбэһэн, нэһиилэ тыыннаах ордубутум. Ол кэннэ Бүлүү баһылыгар Сергей Николаевичка Винокуров массыынанан көмөлөс диэн көрдөһүү ыыппытым. Сергей Николаевич тута сөбүлэһэн «УАЗ» массыына ыыппыта. Ону Волноваха куоракка аҕалан биэрбиттэрэ. Бүлүүбүт массыыната элбэх бааһырбыт байыастары таһаарарбар көмөлөспүтэ. Сергей Николаевичка улахан махтал, ол кэнниттэн атын улуустар эмиэ көмө техника ыытар буолбуттара.
-Билиҥҥи көлүөнэ ыччакка тугу сүбэлиэҥ, баҕа санааҕын этиэҥ этэй?
— Эдэр ыччакка баҕа санаам диэн кылаабынайа үөрэниэххитин наада, оскуоланы бүтэрэн салгыы идэ ылан олоххо туһалаах буолуҥ уонна эйэлээх, дьоллоох олоҕу баҕарабын!
— Кэпсээниҥ иһин махтал.
Ян Степанов, IX кылаас үөрэнээччитэ
Г.И. Чиряев аатынан Бүлүү 1 № -дээх
оскуолатын «Ориентир» медиакиин кэрэспэдьиэнэ